آسٹریلوی ٹیسٹ کرکٹر عثمان خواجہ انٹرنیشنل کرکٹ سے ریٹائر
ماسکو (انٹرنیشنل ڈیسک)
آسٹریلیا کے معروف ٹیسٹ کرکٹر عثمان خواجہ نے انٹرنیشنل کرکٹ سے ریٹائرمنٹ کا اعلان کر دیا ہے۔ وہ اپنی 15 سالہ شاندار کیریئر کا اختتام سڈنی میں ہونے والے پنک ٹیسٹ کے بعد کریں گے، جو ایشیز سیریز کا حصہ ہوگا۔ سڈنی کرکٹ گراؤنڈ سے فرسٹ کلاس کرکٹ کا آغاز کرنے والے عثمان خواجہ 88ویں اور آخری ٹیسٹ میچ کھیل کر کرکٹ سے رخصت ہوں گے۔ 39 سالہ خواجہ نے 2011 میں انٹرنیشنل کرکٹ میں ڈیبیو کیا اور اب تک 6 ہزار سے زائد ٹیسٹ رنز بنائے ہیں۔ کرکٹ آسٹریلیا کے مطابق عثمان خواجہ نے اپنے کیرئیر کے دوران عثمان خواجہ فاؤنڈیشن کے ذریعے آف دی فیلڈ بھی ایک یادگار میراث قائم کی ہے۔ عثمان خواجہ آسٹریلیا کے پہلے پاکستان میں پیدا ہونے والے اور پہلے مسلمان ٹیسٹ کرکٹر ہیں۔ عثمان خواجہ 2023 میں آئی سی سی ٹیسٹ کرکٹر اور شین وارن ٹیسٹ کرکٹر آف دی ایئر قرار پائے، اور وہ اسی سال آئی سی سی ٹیسٹ چیمپئن شپ جیتنے والی آسٹریلوی ٹیم کا حصہ بھی تھے۔ خواجہ نے ریٹائرمنٹ کے اعلان میں کہا کہ سب سے نمایاں احساس ان کے لیے قناعت ہے، اور وہ خوش ہیں کہ اپنے ملک کی نمائندگی کرتے ہوئے لوگوں کو متاثر کر سکے۔
کرکٹ آسٹریلیا کے سی ای او ٹوڈ گرین برگ نے عثمان خواجہ کی غیر معمولی کارکردگی اور فاؤنڈیشن کے ذریعے کیے گئے خدمات کو سراہا اور کہا کہ وہ ایک اسٹائلش اور شاندار بیٹر ہیں، جنہوں نے آسٹریلوی کرکٹ میں شاندار کردار ادا کیا۔ واضح رہے کہ عثمان خواجہ نے اپنے کیریئر میں 87 ٹیسٹ، 40 ون ڈے اور 9 ٹی ٹوئنٹی میچز کھیلے ہیں۔ ایشیز سیریز کا آخری ٹیسٹ 4 جنوری سے سڈنی کرکٹ گراؤنڈ میں شروع ہوگا۔ 
