ڈھاکہ (انٹرنیشنل ڈیسک)
بنگلہ دیش اور بھارت کے درمیان حالیہ سفارتی کشیدگی کے دوران ایک بڑا دفاعی معاہدہ منسوخ کر دیا گیا ہے۔ غیر ملکی میڈیا رپورٹس کے مطابق بنگلہ دیش نے بھارتی کمپنی کے ساتھ 21 ملین ڈالر مالیت کا معاہدہ ختم کر دیا، جس کے تحت ایک جدید سمندری ٹگ کشتی تیار کی جانی تھی۔
یہ معاہدہ کولکتہ میں قائم ایک بھارتی کمپنی کے ساتھ طے پایا تھا، جو بھارتی وزارت دفاع کے ماتحت کام کرتی ہے۔ منسوخ شدہ منصوبے کے تحت بنگلہ دیش کے لیے ایک ایسی خصوصی کشتی بنائی جانی تھی جو کھلے سمندروں میں تجارتی بحری جہازوں کو کھینچنے، بچاؤ اور دیگر امدادی کاموں میں استعمال ہوتی۔
رپورٹ کے مطابق یہ اقدام دونوں ممالک کے درمیان بڑھتی ہوئی تجارتی اور سفارتی کشیدگی کے تناظر میں اٹھایا گیا ہے۔ حالیہ دنوں بھارت کی جانب سے بنگلہ دیش کی بعض مصنوعات کی درآمدات پر اچانک پابندی عائد کر دی گئی تھی، جس پر ڈھاکہ نے سخت ردعمل ظاہر کیا۔
اس کے علاوہ بھارت نے بنگلہ دیشی کارگو کے لیے تیسرے ممالک کو برآمدات کی غرض سے دی جانے والی ٹرانس شپمنٹ سہولت بھی ختم کر دی تھی۔ اس اقدام کو بنگلہ دیش کی معیشت کے لیے ایک بڑا دھچکہ قرار دیا جا رہا ہے، کیونکہ ٹرانزٹ سہولت کے ذریعے بنگلہ دیشی مصنوعات کئی بین الاقوامی منڈیوں تک پہنچتی تھیں۔
تجزیہ کاروں کا کہنا ہے کہ ڈھاکہ کی جانب سے دفاعی معاہدے کی منسوخی بھارت کے ان فیصلوں پر ایک قسم کا سخت ردعمل ہے۔ اس پیش رفت نے دونوں ملکوں کے درمیان پائے جانے والے تناؤ کو مزید اجاگر کر دیا ہے، جو ممکنہ طور پر خطے میں سفارتی تعلقات پر اثر انداز ہو سکتا ہے۔
دونوں ممالک کے مابین تعلقات میں حالیہ تناؤ اس بات کی علامت ہے کہ سیاسی اور اقتصادی فیصلے کس طرح دفاعی اور تجارتی معاہدوں پر بھی اثر انداز ہو سکتے ہیں۔ مبصرین کا کہنا ہے کہ اگر یہی سلسلہ جاری رہا تو جنوبی ایشیا میں اقتصادی تعاون اور دوطرفہ تعلقات کو شدید خطرات لاحق ہو سکتے ہیں۔
