ماسکو(انٹرنیشنل ڈیسک)
بنگلہ دیش نے چین سے جدید J-10CE ملٹی رول جنگی طیارے خریدنے کے فیصلے کی تصدیق کر دی ہے ۔ بنگلہ دیشی حکام کے مطابق گزشتہ سال پاکستان اور بھارت کے درمیان ہونے والی مختصر جنگ میں چینی ساختہ J-10 طیاروں کی کارکردگی نے ڈھاکا کی توجہ حاصل کی، جس کے بعد اس خریداری کا فیصلہ کیا گیا ۔
جنوبی چائنا مارننگ پوسٹ کے مطابق بنگلہ دیش نے چین کے 4.5 نسل کے J-10CE لڑاکا طیارے خریدنے کا فیصلہ کیا ہے اور حکومت نے خریداری کی تجویز منظوری کے لیے وزارت خزانہ اور مسلح افواج کے ڈویژن کو بھیج دی ہے ۔ بنگلہ دیش کے وزیراعظم کے اطلاعات و نشریات کے مشیر زاہد الرحمن کے مطابق اگر موجودہ مالی سال میں ضروری بجٹ مختص کر دیا گیا تو طیاروں کی خریداری فوری طور پر شروع کر دی جائے گی، بصورت دیگر یہ معاملہ اگلے بجٹ تک منتقل ہو سکتا ہے ۔
رپورٹ کے مطابق بنگلہ دیشی دفاعی خریداری کے منصوبے میں چینی ساختہ حملہ آور ہیلی کاپٹرز، وی آئی پی ٹرانسپورٹ ہیلی کاپٹرز اور ڈرونز بھی شامل ہیں ۔ J-10C چین میں تیار کیا جانے والا سنگل انجن، ملٹی رول جنگی طیارہ ہے جو فضائی اور زمینی دونوں اہداف کے خلاف کارروائی کی صلاحیت رکھتا ہے ۔
واضح رہے کہ بنگلہ دیش اور پاکستان کے درمیان بھی دفاعی تعاون میں اضافہ دیکھا گیا ہے۔ رواں سال جنوری میں دونوں ممالک کے فضائی افواج کے سربراہان نے JF-17 تھنڈر جنگی طیاروں کی ممکنہ خریداری سمیت دفاعی تعاون پر تفصیلی بات چیت کی تھی ۔
