بولیویا میں طیارہ حادثہ، 15 افراد ہلاک، 28 زخمی
ماسکو (انٹرنیشنل ڈیسک)
جنوبی امریکی ملک بولیویا کے شہر ایل آلٹو میں طیارہ حادثے کے نتیجے میں کم از کم 15 افراد ہلاک جبکہ 28 زخمی ہو گئے۔ یہ تصدیق وزیرِ صحت مارسیلا فلوریس نے ایک پریس کانفرنس کے دوران کی، جسے سرکاری ٹی وی پر براہِ راست نشر کیا گیا۔ وزیرِ صحت کے مطابق زخمیوں اور ہلاکتوں کی تعداد کی باضابطہ تصدیق کر دی گئی ہے، جبکہ ابتدائی اطلاعات میں زخمیوں کی تعداد کم بتائی گئی تھی۔ بولیویا کی وزارتِ دفاع کے مطابق حادثے کا شکار ہونے والا سی-130 ہرکولیس طیارہ ملک کے مرکزی بینک کی جانب سے منگوائے گئے کرنسی نوٹس منتقل کر رہا تھا۔ طیارہ سانتا کروز سے ایل آلٹو جا رہا تھا کہ ایئرپورٹ کے قریب گر کر تباہ ہو گیا۔
سول ایوی ایشن حکام کے مطابق طیارہ لین سے ہٹ گیا اور قریبی سڑک پر موجود گاڑیوں سے جا ٹکرایا۔ حادثے کے بعد جائے وقوعہ پر اس وقت کشیدگی پیدا ہو گئی جب بعض افراد طیارے سے گرنے والے کرنسی نوٹس جمع کرنے کی کوشش کرنے لگے، جس پر پولیس اور شہریوں کے درمیان جھڑپیں بھی ہوئیں۔
