برازیل میں مصنوعی ذہانت والے روبوٹس کے ذریعے جنگلات کی بحالی کا نیا دور
ماسکو (انٹرنیشنل ڈیسک)
برازیل نے جنگلات کی کٹائی کے خلاف ایک انقلابی قدم اٹھاتے ہوئے ایسے خودکار روبوٹس متعارف کرا دیے ہیں جو فی گھنٹہ اٹھارہ سو درخت لگانے کی صلاحیت رکھتے ہیں۔ یہ روبوٹس صرف تیز رفتار نہیں بلکہ غیر معمولی ذہانت کے حامل بھی ہیں۔ ہر روبوٹ زمین کی ساخت، نمی اور علاقے کے مطابق موزوں ترین مقامی درختوں کا انتخاب کرتا ہے اور ان کی شجرکاری کرتا ہے۔ ماحولیاتی ماہرین کے مطابق برازیل کی یہ کوشش محض تعداد میں درخت لگانے تک محدود نہیں بلکہ اس میں جنگلاتی ماحولیاتی نظام کو قدرتی انداز میں بحال کرنے کا شعور شامل ہے۔ ہر پودے کی جڑوں میں فائدہ مند فنگس داخل کی جاتی ہے تاکہ وہ تیزی سے نشو و نما پائے، جب کہ ہر بیج کو جی پی ایس ٹیگ سے جوڑا جاتا ہے تاکہ اس کی مسلسل نگرانی ممکن ہو سکے۔ یہ روبوٹس شمسی توانائی سے چلتے ہیں اور سخت جنگلاتی حالات میں کام کرنے کے لیے خصوصی طور پر تیار کیے گئے ہیں۔ انہیں دن رات خاموشی سے زمین پر کام کرتے ہوئے دیکھا جا سکتا ہے جو زمین کے پھیپھڑوں کو دوبارہ زندگی بخشنے کے عمل میں مصروف ہیں۔ برازیل کا یہ قدم ماحولیاتی ٹیکنالوجی میں ایک بڑی پیش رفت کے طور پر دیکھا جا رہا ہے۔
