برطانیہ جنگ کی تیاری کر رہا ہے, برطانوی وزیراعظم
ماسکو (انٹرنیشنل ڈیسک)
برطانوی وزیراعظم کیئر اسٹارمر نے پیر کے روز ایک اہم خطاب میں انکشاف کیا ہے کہ برطانیہ جنگی تیاریوں کی طرف بڑھ رہا ہے۔ انہوں نے “اسٹریٹجک ڈیفنس ریویو” کا اعلان کرتے ہوئے کہا کہ برطانیہ ایک جامع اسلحہ سازی مہم شروع کر رہا ہے جو نیٹو کے دیگر رکن ممالک کی مہمات سے ہم آہنگ ہوگی۔ گلاسگو کے گووین شپ یارڈ میں خطاب کرتے ہوئے اسٹارمر نے کہا ہم جنگی تیاری کی سطح پر جا رہے ہیں۔ ہماری دفاعی پالیسی ہمیشہ نیٹو کو اولین حیثیت دے گی۔
اسٹریٹجک ریویو کے تحت برطانیہ نئی اسلحہ ساز فیکٹریاں، طویل فاصلے تک مار کرنے والے میزائل نظام اور دیگر جدید فوجی ٹیکنالوجی پر اربوں پاؤنڈ خرچ کرے گا۔ اسٹارمر کے مطابق، یہ اقدامات برطانیہ کو نیٹو کا سب سے بڑا شراکت دار بنا دیں گے اور 2035 تک برطانوی فوج کی “مہلک صلاحیت” کو دس گنا بڑھا دیا جائے گا۔
انہوں نے وعدہ کیا کہ برطانیہ “نیٹو میں سب سے تیز دفاعی اختراع” کرنے والا ملک بنے گا، اور دفاعی تحقیق کو “جنگی رفتار” پر لے جایا جائے گا۔ ساتھ ہی اسٹارمر نے دفاعی بجٹ کو جی ڈی پی کے 3 فیصد تک بڑھانے کے عزم کا اعادہ کیا۔ وزیراعظم کا کہنا تھا کہ سرد جنگ کے بعد برطانیہ نے جو “امن کا منافع” حاصل کیا، اب اس کی جگہ “دفاعی منافع” لے گا، جس کے نتیجے میں ہزاروں نئی ملازمتیں پیدا ہوں گی — خاص طور پر جوہری ہتھیاروں کی تیاری میں۔
اسٹارمر نے روس پر الزام عائد کیا کہ وہ برطانیہ کے خلاف اشتعال انگیزی، آبی جارحیت اور مہنگائی میں اضافہ کر کے برطانوی عوام کو نقصان پہنچا رہا ہے۔ روس کی جانب سے اس منصوبے پر تنقید کی گئی ہے۔ روسی قانون ساز الیگزی پشکوف نے برطانیہ کے عزائم کو “آئس وار” (برفانی جنگ) کی تیاری قرار دیتے ہوئے کہا کہ “لیبر پارٹی اور کنزرویٹو پارٹی میں روس کے حوالے سے کوئی فرق نہیں۔” انہوں نے اسٹارمر کی جوہری آبدوزوں کی تیاری کی منصوبہ بندی کو سیاسی دکھاوا قرار دیا اور کہا کہ برطانیہ روس، امریکہ اور چین کی سطح تک نہیں پہنچ سکتا۔
اس اعلان سے واضح ہوتا ہے کہ برطانیہ مستقبل قریب میں اپنے دفاعی ڈھانچے کو مکمل جنگی بنیادوں پر استوار کرنے کے لیے پرعزم ہے، اور یہ پالیسی یورپ میں بڑھتی کشیدگی کے تناظر میں سامنے آئی ہے۔
