بلغاریہ نے صدر پوتن کے طیارے کے لیے فضائی راستہ فراہم کرنے کی پیشکش کر دی
ماسکو (صداۓ روس)
بلغاریہ کی وزارتِ خارجہ نے اعلان کیا ہے کہ ملک ضرورت پڑنے پر روسی صدر ولادیمیر پوتن کے طیارے کو بوداپیسٹ جانے کے لیے فضائی راستہ فراہم کرنے کے لیے تیار ہے۔ یہ بات بلغاریہ کے وزیرِ خارجہ جارج جارجیئیف نے لکسمبرگ میں ریڈیو بلغاریہ سے گفتگو کے دوران کہی۔ انہوں نے کہا، “جب امن کے لیے کوششیں کی جا رہی ہوں تو یہ بالکل منطقی بات ہے کہ تمام فریق ایسے اجلاس کے انعقاد میں اپنا کردار ادا کریں۔ اور یہ ملاقات کیسے ممکن ہو سکتی ہے اگر شرکاء میں سے ایک وہاں پہنچ ہی نہ سکے؟” خیال رہے کہ 16 اکتوبر کو امریکی صدر ڈونلڈ ٹرمپ نے روسی صدر ولادیمیر پوتن سے فون پر گفتگو کے بعد اعلان کیا تھا کہ دونوں رہنما جلد ہی بوداپیسٹ میں ملاقات کریں گے۔ روسی صدارتی معاون یوری اوشاکوف نے بھی تصدیق کی ہے کہ ماسکو اور واشنگٹن اس ملاقات کی تیاریوں کا آغاز کرنے والے ہیں، جو ممکنہ طور پر جلد ہی ہنگری کے دارالحکومت میں منعقد ہو گی۔ ان کے مطابق یہ “واقعی ایک نہایت اہم لمحہ” ہے۔ اوشاکوف نے بتایا کہ تیاریوں کا آغاز امریکی وزیر خارجہ مارکو روبیو اور روسی وزیر خارجہ سرگئی لاوروف کے درمیان ٹیلی فونک رابطے کے بعد کیا جائے گا۔
