شنگھائی (صدائے روس)
چین کے شہر تیانجن میں جاری شنگھائی تعاون تنظیم (SCO) کے اجلاس میں چینی صدر شی جن پنگ نے رکن ممالک کے لیے ترقیاتی بینک کے قیام کی تجویز پیش کردی۔ اجلاس میں پاکستان کے وزیراعظم شہباز شریف، روسی صدر ولادیمیر پیوٹن، ترکی کے صدر رجب طیب ایردوان، ملائیشیا کے وزیراعظم انور ابراہیم اور اقوام متحدہ کے سیکرٹری جنرل انتونیو گوتریس سمیت متعدد عالمی رہنما شریک ہوئے۔
چینی صدر نے اپنے خطاب میں کہا کہ شنگھائی تعاون تنظیم باہمی اعتماد اور اصولوں کی بنیاد پر ایک “تناور درخت” کی صورت اختیار کرچکی ہے۔ ان کا کہنا تھا کہ رکن ممالک کو چاہیے کہ وہ تجارت، معیشت اور مختلف شعبوں میں تعاون کے مواقع سے بھرپور فائدہ اٹھائیں تاکہ عوام کی خوشحالی یقینی بنائی جاسکے۔
شی جن پنگ نے زور دیا کہ مشترکہ خوشحال مستقبل کے لیے تجارتی اور مواصلاتی روابط بڑھانا وقت کی اہم ضرورت ہے۔ انہوں نے اس عزم کا اظہار کیا کہ چین رکن ممالک کی سماجی اور معاشی ترقی میں عملی اقدامات کے ذریعے اہم کردار ادا کرے گا۔
دوروزہ اجلاس میں 20 ممالک کے سربراہان شریک ہیں۔ اس موقع پر وزیراعظم پاکستان شہباز شریف بھی خطاب کریں گے اور خطے میں تعاون و استحکام کو فروغ دینے پر زور دیں گے۔
