ڈنمارک کے چڑیا گھر کی اپیل: ناپسندیدہ پالتو جانور درندوں کی خوراک بنائیں
ماسکو (انٹرنیشنل ڈیسک)
ڈنمارک کے شمالی شہر آلبورگ میں قائم ایک چڑیا گھر نے عوام سے اپیل کی ہے کہ وہ اپنے ناپسندیدہ پالتو جانور — جیسے خرگوش، مرغیاں، گنی پگ اور حتیٰ کہ چھوٹے گھوڑے — بطور خوراک عطیہ کریں تاکہ انہیں وہاں موجود درندوں کو کھلایا جا سکے۔ چڑیا گھر نے فیس بک پر جاری ایک پوسٹ میں کہا کہ اس اقدام کا مقصد درندوں کے لیے قدرتی خوراکی سلسلے کی نقل کرنا ہے۔ ادارے کے مطابق مرغیاں، خرگوش اور گنی پگ ان کے درندوں کی خوراک کا اہم حصہ ہیں، اور اس طرح نہ صرف کچھ ضائع نہیں ہوتا بلکہ درندوں کو فطری انداز میں کھانا کھانے کا موقع ملتا ہے، جو ان کی صحت اور رویے کے لیے فائدہ مند ہے۔ چڑیا گھر کی ویب سائٹ پر بتایا گیا کہ عطیہ کیے گئے جانوروں کو تربیت یافتہ عملہ انسانی طریقے سے ہلاک کرے گا اور پھر انہیں خوراک کے طور پر پیش کیا جائے گا۔ آلبورگ چڑیا گھر میں ایشیائی شیر، یورپی لنکس اور سوماترہ کے شیر سمیت کئی گوشت خور جانور موجود ہیں۔
چڑیا گھر کی اس اپیل نے آن لائن ملا جلا ردِعمل پیدا کیا ہے۔ کچھ افراد نے پالتو جانوروں کو شکار بنانے پر اعتراض کیا جبکہ دیگر نے اسے درندوں کی قدرتی خوراکی عادات برقرار رکھنے کی مثبت کوشش قرار دیا۔ آلبورگ چڑیا گھر کی ڈپٹی ڈائریکٹر پیا نیلسن کے مطابق یہ پالیسی کئی برسوں سے جاری ہے اور ڈنمارک میں عام سمجھی جاتی ہے۔ انہوں نے کہا کہ گوشت خور جانوروں کو گوشت، کھال اور ہڈیوں سمیت قدرتی خوراک دینا ضروری ہے تاکہ وہ اپنی فطری عادات کے مطابق کھا سکیں۔
یہ پہلی بار نہیں کہ ڈنمارک کے چڑیا گھر ایسے اقدامات پر توجہ کا مرکز بنے ہوں۔ 2014 میں کوپن ہیگن کے چڑیا گھر نے ایک صحت مند جواں زرافہ “میریئس” کو قریبی رشتہ داری کے خطرے سے بچانے کے لیے مار دیا تھا، جس کا گوشت کچھ درندوں کو کھلایا گیا۔ اسی سال بعد میں چار شیروں کو بھی نئی نسل پیدا کرنے کے منصوبے کے تحت ختم کر دیا گیا تھا۔
