ترکیہ میں تربیتی پرواز کے دوران ایف سولہ طیارہ تباہ، پائلٹ ہلاک
ماسکو(انٹرنیشنل ڈیسک)
ترکیہ کی فضائیہ کا ایک ایف سولہ لڑاکا طیارہ بدھ کی علی الصبح مغربی علاقے میں تربیتی پرواز کے دوران گر کر تباہ ہوگیا، حادثے میں پائلٹ ہلاک ہوگیا۔ حکام کے مطابق طیارہ صوبہ بالیکسیر میں قائم ترک فضائیہ کے نویں مین جیٹ بیس کمانڈ سے وابستہ تھا۔ سرکاری بیان میں کہا گیا ہے کہ طیارے سے پرواز کے فوراً بعد ریڈیو رابطہ منقطع ہوگیا جس پر فوری سرچ اینڈ ریسکیو آپریشن شروع کیا گیا۔ امدادی ٹیموں نے بعد ازاں ملبہ تلاش کرلیا اور پائلٹ کی ہلاکت کی تصدیق کی۔ بالیکسیر کے گورنر اسماعیل اُستاؤغلو نے حادثے کو معمول کی مشن فلائٹ کے دوران پیش آنے والا واقعہ قرار دیتے ہوئے پائلٹ کے اہلِ خانہ سے تعزیت کی اور اسے دورانِ ڈیوٹی جان قربان کرنے والا “شہید” کہا۔
ترک وزارتِ قومی دفاع نے بتایا کہ حادثے کی حتمی وجہ تاحال معلوم نہیں ہوسکی، جس کے تعین کے لیے تکنیکی تحقیقات کا آغاز کر دیا گیا ہے۔ سوشل میڈیا پر گردش کرنے والی ویڈیوز میں برسا۔ازمیر شاہراہ کے قریب ریسکیو گاڑیوں اور امدادی اہلکاروں کو جائے حادثہ پر دیکھا جا سکتا ہے جبکہ حکام نے علاقے کو گھیرے میں لے لیا۔ ادھر وزیرِ انصاف اکِن گُرلیک نے اعلان کیا کہ بالیکسیر پبلک پراسیکیوٹرز آفس نے باضابطہ انکوائری شروع کر دی ہے۔ پراسیکیوٹرز اور فرانزک ٹیمیں ملبے کا معائنہ اور شواہد اکٹھے کر رہی ہیں۔ ابتدائی طور پر مکینیکل خرابی، موسم یا انسانی عوامل سے متعلق کوئی نتیجہ جاری نہیں کیا گیا۔ 
