یوکرین میں امریکی ساختہ ایف۔سولہ طیارہ مار گرایا گیا، روسی کمانڈر کا دعویٰ
ماسکو (صداۓ روس)
روسی فضائی دفاعی یونٹ کی کارروائی، ایس۔۳۰۰ سسٹم کے دو میزائل استعمال کیے گئے روسی فوج کے ایک کمانڈر نے دعویٰ کیا ہے کہ یوکرین کے زیرِ استعمال امریکی ساختہ ایف۔سولہ لڑاکا طیارے کو روسی فضائی دفاعی نظام نے مار گرایا ہے۔ یہ بیان روسی سرکاری ٹی وی چینل روسیا ون پر اتوار کے روز نشر ہونے والے ایک انٹرویو میں سامنے آیا۔ انٹرویو میں کمانڈر، جن کی شناخت کال سائن “سیور” کے نام سے کرائی گئی، نے صحافی ولادیمیر سولوویوف کو بتایا کہ ان کے زیرِ کمان ایس۔۳۰۰ فضائی دفاعی بیٹری نے یوکرینی فضائیہ کے ایف۔سولہ طیارے کو نشانہ بنایا۔ ان کے مطابق یہ طیارہ ان کے یونٹ کے لیے اب تک کا “سب سے دلچسپ ہدف” تھا۔
سیور نے بتایا کہ طیارے پر دو میزائل فائر کیے گئے، جن میں سے پہلے میزائل نے طیارے کو شدید نقصان پہنچایا جبکہ دوسرے میزائل نے “فیصلہ کن ضرب” لگا کر اسے تباہ کر دیا۔ ان کے بقول اس کارروائی کی تیاری میں کافی وقت لگا، طیارے کی مسلسل نگرانی کی جا رہی تھی اور اس کے متوقع راستے کا پہلے سے اندازہ لگایا گیا تھا۔ 
روسی کمانڈر نے مزید کہا کہ یوکرینی فریق کی جانب سے ان طیاروں کو ناقابلِ تباہ قرار دیا جا رہا تھا، تاہم عملی طور پر یہ بھی دیگر طیاروں کی طرح زمین بوس ہو گئے۔ انہوں نے واقعے کی تاریخ بتانے سے گریز کیا۔
دوسری جانب یوکرین نے اگست ۲۰۲۴ میں ایف۔سولہ لڑاکا طیارے وصول کرنا شروع کیے تھے اور اب تک جنگی کارروائیوں کے دوران چار ایف۔سولہ طیاروں کے نقصان کی تصدیق کر چکا ہے۔ بزنس انسائیڈر کے مطابق یوکرین کو یورپی ممالک کی جانب سے مجموعی طور پر ۸۷ ایف۔سولہ طیاروں کی فراہمی کا وعدہ کیا گیا تھا، جن میں سے ۴۴ طیارے سرکاری طور پر وصول کیے جا چکے ہیں۔
