فیلڈ مارشل عاصم منیر کی چین کے نائب صدر اور وزیرِ خارجہ سے اہم ملاقاتیں
اسلام آباد (صداۓ روس)
بیجنگ میں فیلڈ مارشل سید عاصم منیر نے چین کے نائب صدر ہان ژینگ اور وزیرِ خارجہ وانگ ژی سمیت اعلیٰ سیاسی و عسکری قیادت سے اہم ملاقاتیں کیں۔ پاک فوج کے شعبہ تعلقاتِ عامہ (آئی ایس پی آر) کے مطابق فیلڈ مارشل عاصم منیر نے چین کا سرکاری دورہ کیا، جس دوران پاک چین آہنی اسٹریٹجک شراکت داری کی ازسرِ نو توثیق کی گئی۔ ان ملاقاتوں میں علاقائی و عالمی سیاسی صورتحال، سی پیک کے تحت جاری رابطہ کاری منصوبے، اور مشترکہ جغرافیائی سیاسی چیلنجز سے نمٹنے کے لیے مربوط حکمتِ عملی پر تفصیلی گفتگو کی گئی۔ دونوں ممالک نے خودمختاری، کثیرالجہتی تعاون اور علاقائی استحکام کے لیے اپنے مشترکہ عزم کا اعادہ کیا۔ چینی قیادت نے جنوبی ایشیا میں امن و استحکام کے فروغ میں افواجِ پاکستان کے کردار کو سراہتے ہوئے دو طرفہ تعلقات کی مضبوطی پر اطمینان کا اظہار کیا۔
فیلڈ مارشل عاصم منیر نے وائس چیئرمین سینٹرل ملٹری کمیشن جنرل ژانگ یوشیا، پیپلز لبریشن آرمی کے پولیٹیکل کمشنر جنرل چن ہوئی اور چیف آف اسٹاف لیفٹیننٹ جنرل کائی ژائی جن سے بھی علیحدہ علیحدہ ملاقاتیں کیں۔ ملاقاتوں میں دفاعی تعاون، انسداد دہشت گردی، مشترکہ تربیت، دفاعی جدید کاری اور ادارہ جاتی روابط کو فروغ دینے پر زور دیا گیا۔ اس کے ساتھ ساتھ ہائبرڈ اور سرحد پار خطرات کے تناظر میں آپریشنل ہم آہنگی اور اسٹریٹجک کوآرڈینیشن کو مزید مضبوط بنانے پر بھی گفتگو ہوئی۔ چینی عسکری قیادت نے پاک چین دفاعی شراکت داری پر مکمل اعتماد کا اظہار کیا اور خطے میں امن کے لیے پاکستان کے کلیدی کردار کو تسلیم کیا۔ فیلڈ مارشل عاصم منیر نے چین کی مسلسل حمایت پر شکریہ ادا کیا اور دفاعی تعلقات کو مزید وسعت دینے کے عزم کا اعادہ کیا۔
