مغربی آسٹریا میں برفانی تودوں کی زد میں آ کر پانچ اسکیئرز ہلاک
ماسکو (انٹرنیشنل ڈیسک)
سی این این کی رپورٹ کے مطابق مغربی آسٹریا کے علاقے سالزبرگ، ایبن ام پونگاؤ میں برفانی تودے گرنے کے نتیجے میں پانچ اسکیئرز ہلاک ہو گئے۔ یہ واقعہ 17 جنوری کو پیش آیا۔ رپورٹ کے مطابق سالزبرگ کے جنوب میں واقع گاسٹائن ویلی میں برفانی تودے کی زد میں آ کر چار اسکیئرز جان سے ہاتھ دھو بیٹھے۔ اس واقعے سے تقریباً 90 منٹ قبل قریبی علاقے باد ہوف گاسٹائن میں ایک خاتون اسکیئر بھی برفانی تودے تلے دب کر ہلاک ہو گئی تھیں۔ اطلاع کے مطابق جس مقام پر چار لاشیں برآمد ہوئیں، وہاں کچھ افراد زندہ بھی پائے گئے۔ ان میں سے دو افراد زخمی حالت میں تھے جبکہ ایک شخص محفوظ رہا۔ سرچ اور ریسکیو آپریشن میں چار ریسکیو ہیلی کاپٹرز کے علاوہ تین خصوصی ٹیموں نے حصہ لیا، جن میں ماؤنٹین ریسکیو ٹیم، ریڈ کراس کی کینائن یونٹ اور ایمرجنسی ریسپانس ٹیم شامل تھیں۔ رپورٹ میں مزید کہا گیا ہے کہ 13 جنوری کو سوئس اسکی ایسوسی ایشن نے بھی اطلاع دی تھی کہ سوئٹزرلینڈ کے اسنو بورڈنگ کے پہلے اولمپک میڈلسٹ، 50 سالہ اولی کیسٹن ہولز، ایک برفانی تودے کی زد میں آ کر ہلاک ہو گئے تھے۔
