امریکہ میں خوراک کی قلت دوگنا ہوگئی، کروڑوں متاثر
ماسکو (انٹرنیشنل ڈیسک)
امریکہ میں خوراک کی کمی کا بحران شدت اختیار کر گیا ہے، اور بالغ افراد میں غذائی عدم تحفظ کی شرح 2021 کے مقابلے میں تقریباً دوگنا ہو چکی ہے۔ امریکی جریدے “ایکسوس” کے مطابق، یہ اعداد و شمار تحقیقی ادارے “مارننگ کنسلٹ” کے تازہ سروے سے سامنے آئے ہیں، جس نے بڑھتی ہوئی بھوک اور غذائی قلت پر سنگین خدشات ظاہر کیے ہیں۔ رپورٹ کے مطابق مئی 2025 میں 15.6 فیصد بالغ امریکی شہریوں نے اعتراف کیا کہ انہیں اکثر یا کبھی کبھار کھانے کے لیے ناکافی خوراک دستیاب ہوتی ہے۔ یہ شرح 2021 میں ریکارڈ کی گئی سطح سے تقریباً دوگنا ہے، جب حکومت کی طرف سے اضافی فوڈ اسٹامپس اور بچوں کے لیے ٹیکس کریڈٹ جیسے اقدامات نے غربت کو کم کرنے اور خوراک تک رسائی کو بہتر بنانے میں اہم کردار ادا کیا تھا۔
تاہم حالیہ دنوں میں فوڈ سپورٹ پروگرامز میں کٹوتیوں نے صورت حال کو مزید خراب کر دیا ہے۔ سابق صدر ڈونلڈ ٹرمپ کی جانب سے گزشتہ ہفتے منظور شدہ “بگ، بیوٹی فل بل” کے تحت آئندہ دس سالوں میں فوڈ اسٹیمپ پروگرام میں 230 ارب ڈالر کی کٹوتی کی جائے گی۔ نئے قانون کے تحت کام کے لیے سخت شرائط عائد کی گئی ہیں، جن کا اطلاق اب 64 سال تک کی عمر کے افراد پر ہوگا، جبکہ والدین کے لیے چھوٹ میں بھی کمی کر دی گئی ہے۔
مارننگ کنسلٹ کے چیف ماہرِ اقتصادیات جان لئیر نے صورتحال کو تشویشناک قرار دیتے ہوئے کہا کہ “وال اسٹریٹ پر ریکارڈ ہائیز اور ملک میں بڑھتی بھوک کے درمیان اب ایک گہرا تضاد پیدا ہو چکا ہے۔ فلاڈیلفیا میں “شیئر فوڈ پروگرام” کے ایگزیکٹو ڈائریکٹر جارج میٹسیک کے مطابق، گزشتہ تین برسوں میں ان کے فوڈ بینک پر خوراک مانگنے والوں کی تعداد میں 120 فیصد اضافہ ہوا ہے۔ ان کا کہنا تھا کہ جیسے ہی 2022 میں حکومتی امداد میں کمی آئی، بھوک کے شکار افراد کی تعداد میں اضافہ شروع ہو گیا۔
امریکی کانگریس کی جانب سے حالیہ کٹوتیوں کے بعد مزید لاکھوں افراد کی فوڈ اسسٹنس چھن جانے یا اس میں کمی کا خدشہ ہے۔ کانگریشنل بجٹ آفس کا اندازہ ہے کہ کام کی نئی شرائط کی وجہ سے ہر مہینے اوسطاً 32 لاکھ افراد کو خوراک کی امداد سے محروم ہونا پڑ سکتا ہے۔ ملک بھر کے فوڈ بینکس نے متنبہ کیا ہے کہ جیسے ہی یہ نئی پابندیاں نافذ ہوں گی، خوراک کی طلب میں مزید اضافہ ہوگا، اور پہلے سے دباؤ کا شکار ادارے مزید بوجھ برداشت نہیں کر سکیں گے۔
