ماسکو (انٹرنیشنل ڈیسک)
فرانسیسی پولیس گزشتہ ہفتے کے اختتام پر ہونے والی لوٹ مار اور بدامنی سے منسلک ملزمان کی شناخت اور گرفتاری کے لیے سوشل میڈیا کا سہارا لے رہی ہے۔ تفتیش کار آن لائن پوسٹ کی گئی ویڈیوز کے ساتھ ہزاروں سیکیورٹی کیمروں کی فوٹیج کا جائزہ لے کر ملزمان کا سراغ لگا رہے ہیں اور شواہد جمع کر رہے ہیں۔ یہ کارروائی ایسے وقت میں ہو رہی ہے جب حکومت نے دکانوں کو پہنچنے والے نقصان اور تشدد کے ذمہ داروں کو جوابدہ بنانے کا عزم ظاہر کیا ہے۔
دس اسکرینوں والے خصوصی آپریشن روم میں بیٹھے ایک اہلکار نے بتایا کہ وہ سوشل نیٹ ورکس پر کام کر رہے ہیں اور پھر اپنے ذرائع سے اس مواد کی جانچ کرتے ہیں کہ آیا سوشل میڈیا پر نظر آنے والے جرائم ان جرائم سے مطابقت رکھتے ہیں جن کی وہ تحقیق کر رہے ہیں۔ صرف پہلے نام برونو سے شناخت کیے گئے اس اہلکار نے ایک ویڈیو کا باریک بینی سے جائزہ لیتے ہوئے کہا کہ انہیں یقین ہے کہ انہوں نے چار نوجوانوں کے اس گروہ کی شناخت کر لی ہے جس نے پیرس کی سڑکوں کو داغدار کرنے والی لوٹ مار میں حصہ لیا۔ گلیوں کے سیکیورٹی کیمروں اور پیرس کے علاقے کے ٹرانسپورٹ نظام میں نصب کیمروں کی مدد سے برونو نے ان چاروں کا ان کی لوٹی ہوئی اشیا سمیت تقریباً ان کے گھروں کے پتوں تک سراغ لگایا۔ یہ اہلکار تنگ سیکیورٹی آپریشنل کوآرڈینیشن سینٹر میں اسی طرح کی ڈیجیٹل تلاش کرنے والے درجن بھر ماہرین میں شامل تھا۔
رپورٹس کے مطابق تفتیش کار ٹک ٹاک، انسٹاگرام اور ڈسکارڈ کی ویڈیوز اور عینی شاہدین کے جمع کرائے گئے مواد کا موازنہ 80 ہزار سیکیورٹی کیمروں کی فوٹیج سے کر رہے ہیں، جبکہ پولیس کی مجرمانہ تصاویر کا سوشل میڈیا کی تصاویر سے موازنہ کرنے کے لیے چہرے کی شناخت کی ٹیکنالوجی بھی استعمال کی جائے گی۔ اس مہم پر 200 سے زائد تفتیش کار مامور ہیں۔ وزیراعظم سباستیان لوکورنو نے 200 سے زائد تفتیش کاروں کو اس کام پر لگایا ہے، اور ٹرانسپورٹ سیکیورٹی سروسز کو منظم جرائم سے لڑنے والی پولیس یونٹ کے ساتھ ملا کر ایک خصوصی قومی شناختی یونٹ بھی قائم کیا گیا ہے۔ وزیر انصاف جیرالڈ دارمانن نے بھی چہرے کی شناخت کی ٹیکنالوجی کے استعمال کا اعلان کیا۔ ٹیم پیر سے کام کر رہی ہے اور اس کے پاس 80 ہزار سیکیورٹی کیمروں کی تصاویر تک رسائی ہے۔
پیرس کے علاقے کے ایک سیکیورٹی اہلکار میشل لاوو نے اپنی ٹیم کو بتایا کہ ہنگاموں کے دوران سڑکوں پر ہونے والے جرائم کے عینی شاہدین کے لیے اپنی ریکارڈ کردہ تصاویر اپ لوڈ کرنے کا ایک پلیٹ فارم بنا دیا گیا ہے۔ برونو کے مطابق بعض اوقات متاثرین صدمے کی وجہ سے پولیس اسٹیشن جا کر رپورٹ نہیں کرتے، مگر سوشل میڈیا پر اس کا ذکر کر دیتے ہیں۔ یہ طریقہ حال ہی میں دیگر مظاہروں سے متعلق مقدمات میں بھی استعمال ہو چکا ہے۔ وزیراعظم لوکورنو کے مطابق سوشل میڈیا پر گردش کرنے والی فوٹیج میں بہت سے مبینہ لٹیروں نے اپنے چہرے نہیں ڈھانپے تھے۔
