روس کی بڑھتی عسکری صلاحیت سے خطرہ ہے، جرمنی اور برطانیہ کا انتباہ
ماسکو (انٹرنیشنل ڈیسک)
جرمنی اور برطانیہ کی مسلح افواج کے اعلیٰ فوجی سربراہان نے خبردار کیا ہے کہ ماسکو تیزی سے اپنی عسکری توجہ مغرب کی جانب منتقل کر رہا ہے، جو یورپی سلامتی کے لیے خطرات میں اضافہ کر سکتا ہے۔ یہ انتباہ جرمن فوج کے انسپکٹر جنرل Carsten Breuer اور برطانوی مسلح افواج کے سربراہ Richard Knighton کے ایک مشترکہ مضمون میں سامنے آیا، جو جرمن اخبار Die Welt اور برطانوی اخبار The Guardian میں شائع ہوا۔ مشترکہ مضمون میں کہا گیا کہ روسی فوج کی ’’ایسے انداز میں ازسرِنو تنظیم‘‘ کی جا رہی ہے، جو NATO ممالک کے ساتھ ممکنہ تصادم کے خطرے کو بڑھا سکتی ہے۔ دونوں سربراہان کے مطابق یوکرین میں جاری جنگ اس بات کی علامت ہے کہ روس نہ صرف اپنی عسکری صلاحیتوں میں اضافہ کر رہا ہے بلکہ یورپ میں طویل المدت کشیدگی کے لیے تیاری بھی ظاہر کر چکا ہے۔
فوجی قیادت نے اس صورتحال کے تناظر میں یورپی ممالک پر زور دیا کہ وہ دفاعی تیاریوں کو مضبوط بنائیں اور دفاعی صنعت کی صنعتی بنیادوں کو وسعت دیں۔ مضمون میں نشاندہی کی گئی کہ جدید تنازعات میں مضبوط صنعتی ڈھانچہ کسی بھی بڑی جنگ کو جاری رکھنے اور بالآخر کامیابی حاصل کرنے کے لیے کلیدی حیثیت رکھتا ہے۔ بروئر اور نائٹن نے واضح کیا کہ فوجی تیاری ’’جنگ پسندی نہیں بلکہ عوام کے تحفظ اور امن کے قیام کے لیے ذمہ دارانہ اقدام‘‘ ہے۔ ان کے بقول، ’’طاقت جارحیت کو روکتی ہے، جبکہ کمزوری اسے دعوت دیتی ہے۔‘‘ 
