(صدائے روس) اسلام آباد
حکومتِ پاکستان نے مالی سال کے اختتام سے قبل، 30 جون 2025 تک، کمرشل بینکوں سے مزید ایک ارب ڈالر قرض لینے کا فیصلہ کرلیا ہے۔ وزارتِ خزانہ نے متحدہ عرب امارات کے تین بینکوں سے یہ قرض حاصل کرنے کے لیے باضابطہ طور پر درخواست جمع کرادی ہے۔
وزارتِ خزانہ کے باوثوق ذرائع کے مطابق، یہ نیا کمرشل قرضہ اسٹیٹ بینک آف پاکستان کے زرمبادلہ کے ذخائر کو مستحکم کرنے کے لیے لیا جا رہا ہے۔ اس اقدام کا مقصد بین الاقوامی مالیاتی فنڈ (آئی ایم ایف) کی شرائط کو پورا کرنا اور زرمبادلہ کے ذخائر میں مقررہ ہدف حاصل کرنا ہے۔
ذرائع کا کہنا ہے کہ آئی ایم ایف نے حکومتِ پاکستان کو 30 جون 2025 تک اسٹیٹ بینک کے زرمبادلہ کے ذخائر کو 13.9 ارب ڈالر تک پہنچانے کا ہدف دے رکھا ہے۔
اسی مقصد کے تحت حکومت نے متحدہ عرب امارات (یو اے ای) کے تین اہم بینکوں — شارجہ اسلامک بینک، ابوظہبی اسلامک بینک، اور عجمان بینک — سے رابطہ کیا ہے۔
ذرائع نے مزید بتایا کہ وزارتِ خزانہ نے ان تین بینکوں سے مجموعی طور پر 1 ارب ڈالر کا کمرشل قرض حاصل کرنے کے لیے باضابطہ درخواست پیش کردی ہے، تاکہ آئی ایم ایف کی مقرر کردہ شرائط پر عمل درآمد کو ممکن بنایا جا سکے۔
ماہرین کے مطابق، اگر یہ قرض حاصل کر لیا جاتا ہے تو یہ قلیل مدتی طور پر زرمبادلہ کے ذخائر میں بہتری لائے گا، تاہم اس سے بیرونی قرضوں کے بوجھ میں بھی اضافہ ہوگا، جو پہلے ہی ملکی معیشت پر ایک بڑا دباؤ ہے۔
