ایرانی حملے کے بعد حیفہ کی بیزان ریفائنری تباہ
ماسکو (انٹرنیشنل ڈیسک)
اسرائیل کے شہر حیفہ میں قائم مشہور بیزان گروپ نے اعلان کیا ہے کہ ان کی تمام ریفائنری تنصیبات مکمل طور پر بند کر دی گئی ہیں۔ یہ فیصلہ اس وقت لیا گیا جب ایران کے ایک حالیہ حملے میں اس پاور اسٹیشن کو شدید نقصان پہنچا، جو بھاپ اور بجلی کی پیداوار کے لیے استعمال ہوتا تھا۔ بیزان گروپ کی جانب سے پیر کے روز جاری کردہ ایک ضابطہ جاتی رپورٹ میں بتایا گیا ہے کہ حملے کے نتیجے میں تنصیبات کی بنیادی توانائی فراہمی متاثر ہوئی، جس کے باعث ریفائنری آپریشنز کو فوری طور پر روکنا پڑا۔ رپورٹ کے مطابق موجودہ صورت حال کا جائزہ لیا جا رہا ہے اور ماہرین کی ٹیم نقصانات کا تخمینہ لگا رہی ہے۔
اس واقعے سے اسرائیل کی توانائی اور صنعتی پیداوار پر سنگین اثرات مرتب ہونے کا خدشہ ظاہر کیا جا رہا ہے، کیونکہ بیزان گروپ ملک کی سب سے بڑی آئل ریفائنری میں شمار ہوتا ہے۔ تجزیہ کاروں کے مطابق اگر پاور اسٹیشن کی مرمت میں تاخیر ہوئی تو ایندھن کی فراہمی کے بحران میں مزید شدت آ سکتی ہے۔ واضح رہے کہ ایران اور اسرائیل کے درمیان حالیہ دنوں میں کشیدگی میں نمایاں اضافہ ہوا ہے، جس کے نتیجے میں دونوں ممالک کے درمیان براہِ راست حملے بھی دیکھنے میں آ رہے ہیں۔
