پاکستان میں شدید گرمی کی لہر، درجہ حرارت 48 تک جانے کا امکان
اسلام آباد (صداۓ روس)
پاکستان کے مختلف علاقوں میں شدید گرمی کی نئی لہر کا آغاز ہو چکا ہے جس کے دوران درجہ حرارت 48 ڈگری سینٹی گریڈ تک پہنچنے کا امکان ظاہر کیا گیا ہے۔ محکمہ موسمیات کے مطابق آئندہ چند روز میں پنجاب، سندھ اور جنوبی خیبرپختونخوا کے میدانی علاقوں میں گرمی کی شدت مزید بڑھ سکتی ہے۔ محکمہ موسمیات کا کہنا ہے کہ گرمی کی اس شدید لہر کے دوران دن کے اوقات میں دھوپ کی تپش معمول سے کہیں زیادہ محسوس کی جائے گی جبکہ گرم ہواؤں کے جھکڑ بھی چلنے کا امکان ہے۔ لاہور، ملتان، فیصل آباد، بہاولپور، جیکب آباد، سکھر، دادو، حیدرآباد اور نواب شاہ سمیت کئی شہروں میں درجہ حرارت 45 سے 48 ڈگری کے درمیان رہنے کا خدشہ ہے۔
ماہرین صحت نے شہریوں کو ہدایت کی ہے کہ وہ غیر ضروری طور پر دھوپ میں نکلنے سے گریز کریں، دن کے گرم ترین اوقات میں گھر کے اندر رہیں، پانی کا زیادہ استعمال کریں اور ہلکے کپڑے پہنیں تاکہ ہیٹ اسٹروک سے بچا جا سکے۔ محکمہ موسمیات نے کسانوں کو بھی ہدایت کی ہے کہ فصلوں کو شدید گرمی سے بچانے کے لیے ضروری اقدامات کریں، اور پانی کی فراہمی کا خصوصی انتظام یقینی بنائیں۔ واضح رہے کہ رواں برس پاکستان میں گرمی کی یہ تیسری بڑی لہر ہے، جسے ماحولیاتی ماہرین موسمیاتی تبدیلیوں کا نتیجہ قرار دے رہے ہیں۔
