بھارت میں انتہا پسندی کا نیا واقعہ: شاپنگ مال میں کرسمس سجاوٹ پر حملہ
ماسکو (انٹرنیشنل ڈیسک)
بھارتی ریاست چھتیس گڑھ کے دارالحکومت رائے پور میں بدھ کے روز ہندو تنظیموں کی جانب سے دی گئی ہڑتال کے دوران ایک سنگین واقعہ پیش آیا، جب نقاب پوش افراد کے ایک گروہ نے شہر کے معروف میگنیٹو مال میں کرسمس کی سجاوٹ کو توڑ پھوڑ کا نشانہ بنایا اور عملے کو خوف و ہراس میں مبتلا کر دیا۔ یہ واقعہ ایسے وقت میں پیش آیا جب ہندو تنظیموں نے مبینہ مذہبی تبدیلیوں اور کانکر ضلع میں پولیس کارروائی کے خلاف ریاست گیر بند کی کال دے رکھی تھی۔ رائے پور کے بیشتر بازار بند تھے، تاہم میگنیٹو مال جزوی طور پر کھلا ہوا تھا جہاں عملہ کرسمس کی تقریبات کے لیے صفائی اور سجاوٹ کے کام میں مصروف تھا۔ مال انتظامیہ کے مطابق تقریباً 30 سے 40 نقاب پوش افراد، جن کے ہاتھوں میں لاٹھیاں تھیں، دوپہر کے قریب مال میں داخل ہوئے اور کرسمس کی سجاوٹ کو نقصان پہنچانا شروع کر دیا۔ سی سی ٹی وی فوٹیج میں توڑ پھوڑ کے مناظر واضح طور پر دیکھے جا سکتے ہیں، جو عوامی مقامات پر کی گئی اس کارروائی کی سنگینی کو ظاہر کرتے ہیں۔ متاثرہ ملازمین نے الزام لگایا کہ حملہ آوروں نے نہ صرف سجاوٹ کو تباہ کیا بلکہ عملے کے افراد کو روک کر ان کے نام اور مذہب کے بارے میں سوالات کیے، شناختی کارڈ چیک کیے اور غیر ہندو ملازمین کو دھمکیاں بھی دیں۔ اس اچانک تشدد کے باعث کئی ملازمین، خصوصاً خواتین، شدید خوف کا شکار ہو گئیں۔
میگنیٹو مال کی ایونٹ منیجر آتا گپتا کے مطابق اس واقعے سے مال کے عملے میں شدید گھبراہٹ پھیل گئی، جبکہ مالی نقصان کا اندازاً پندرہ سے بیس لاکھ بھارتی روپے لگایا جا رہا ہے۔ شکایت موصول ہونے پر پولیس موقع پر پہنچی، تاہم سوشل میڈیا پر گردش کرنے والی ویڈیوز میں دیکھا جا سکتا ہے کہ پولیس کی موجودگی کے باوجود توڑ پھوڑ کا سلسلہ کچھ دیر تک جاری رہا۔ رائے پور کے تھانہ انچارج اویناش سنگھ نے بتایا کہ 30 سے 40 نامعلوم افراد کے خلاف بھارتیہ نیائے سنہیتا کی مختلف دفعات کے تحت مقدمہ درج کر لیا گیا ہے، جن میں توڑ پھوڑ، غیر قانونی اجتماع اور زبردستی داخلے کے الزامات شامل ہیں۔ ان کے مطابق سی سی ٹی وی فوٹیج اور گاڑیوں کے رجسٹریشن نمبرز حاصل کر لیے گئے ہیں اور ملزمان کی شناخت کے بعد گرفتاریاں عمل میں لائی جائیں گی۔ واقعے پر ردعمل دیتے ہوئے بھارتی نیشنل کانگریس نے سوشل میڈیا پر ویڈیوز شیئر کرتے ہوئے الزام عائد کیا کہ دائیں بازو سے وابستہ گروہ اس کارروائی کے ذمہ دار ہیں اور کرسمس کے موقع پر اقلیتی برادریوں کو نشانہ بنایا جا رہا ہے۔ کانگریس نے بی جے پی کی قیادت میں قائم ریاستی حکومت پر عدم برداشت کا ماحول پیدا کرنے کا الزام بھی عائد کیا، اور دعویٰ کیا کہ اسی نوعیت کے واقعات دیگر ریاستوں میں بھی رپورٹ ہو رہے ہیں۔ 
