بھارتی ایئر فورس کا پاکستانی سرحد کے قریب بڑے پیمانے پر فضائی مشقوں کا اعلان
ماسکو (انٹرنیشنل ڈیسک)
بھارتی ایئر فورس نے پاکستان کی سرحد کے قریب واقع ریاست گجرات کے بعض علاقوں میں بڑے پیمانے پر فضائی مشقوں کے انعقاد کا اعلان کیا ہے۔ اس مقصد کے لیے بھارتی حکام نے 20 جنوری سے 21 جنوری تک متعلقہ فضائی حدود کو بین الاقوامی پروازوں کے لیے بند کرتے ہوئے انہیں بھارتی فضائیہ کی مشقوں کے لیے مختص کرنے کا فیصلہ کیا ہے، جس کے لیے باقاعدہ نوٹس ٹو ایئر مین (نوٹم) بھی جاری کر دیا گیا ہے۔
ذرائع کے مطابق ان فضائی مشقوں میں بھارتی ایئر فورس کے جدید اور فرنٹ لائن جنگی طیارے حصہ لیں گے، جن میں رافیل، سخوئی 30 ایم کے آئی، جیگوار اور دیگر لڑاکا طیارے شامل ہیں۔ مشقوں کے دوران تیز رفتار پروازیں، فضاء میں جنگی حکمتِ عملی کی مشقیں، ہوائی لڑائی کی تربیت اور ممکنہ طور پر لائیو فائرنگ یا بمباری کی مشقیں بھی کی جا سکتی ہیں۔ 
یہ محدود فضائی زون بھارت اور پاکستان کے درمیان واقع جنوبی سرحد کے حساس علاقوں پر محیط ہے، جس میں بحیرہ عرب، سر کریک، راجکوٹ اور احمد آباد کے قریبی علاقے شامل ہیں۔ دفاعی ماہرین کے مطابق اس نوعیت کی مشقیں خطے میں پہلے سے موجود کشیدگی کے تناظر میں خاص اہمیت رکھتی ہیں، کیونکہ ان کا انعقاد براہِ راست سرحدی علاقوں کے قریب کیا جا رہا ہے۔
ماضی میں بھی بھارت اس قسم کی مشقوں کے ذریعے اپنی فضائی صلاحیتوں کا مظاہرہ کرتا رہا ہے، تاہم موجودہ علاقائی صورتحال کے باعث ان مشقوں کو خطے میں سکیورٹی اور اسٹریٹیجک توازن کے تناظر میں بغور دیکھا جا رہا ہے۔ پاکستان کی جانب سے تاحال اس اعلان پر کوئی باضابطہ ردِعمل سامنے نہیں آیا۔
