بھارتی فضائیہ کا سخوئی 30 ایم کے آئی جنگی طیارہ لاپتہ، ریسکیو آپریشن شروع
ماسکو(انٹرنیشنل ڈیسک)
بھارتی فضائیہ نے اعلان کیا ہے کہ اس کا ایک سخوئی 30 ایم کے آئی جنگی طیارہ مقررہ وقت پر واپس نہیں آیا اور اس سے رابطہ بھی منقطع ہو گیا ہے، جس کے بعد تلاش اور ریسکیو آپریشن شروع کر دیا گیا ہے۔ بھارتی فضائیہ کے مطابق یہ طیارہ جمعرات کو مقامی وقت کے مطابق شام 7 بج کر 42 منٹ پر شمال مشرقی بھارتی ریاست آسام کے شہر جورہاٹ سے اڑان بھرنے کے بعد لاپتہ ہوا۔ فضائیہ کی جانب سے سوشل میڈیا پلیٹ فارم ایکس پر جاری بیان میں کہا گیا ہے کہ طیارہ مقررہ وقت سے تاخیر کا شکار ہے اور اس سے آخری رابطہ بھی اسی وقت ہوا تھا۔ بیان میں کہا گیا ہے کہ واقعے کی مزید تفصیلات معلوم کی جا رہی ہیں جبکہ لاپتہ طیارے اور اس میں سوار عملے کی تلاش کے لیے سرچ اینڈ ریسکیو مشن شروع کر دیا گیا ہے۔
بھارتی فضائیہ کو حالیہ عرصے میں جنگی طیاروں سے متعلق متعدد حادثات کا سامنا کرنا پڑا ہے۔ تقریباً دس روز قبل ہی بھارتی فضائیہ کا مقامی طور پر تیار کردہ ہلکا لڑاکا طیارہ تیجس ایک فرنٹ لائن ایئر بیس پر رن وے سے آگے نکل گیا تھا جس کے نتیجے میں اس کے ڈھانچے کو شدید نقصان پہنچا تھا۔ اس سے قبل گزشتہ سال نومبر میں دبئی ایئر شو کے دوران ایک اور تیجس طیارہ مظاہرے کی پرواز کے دوران گر کر تباہ ہو گیا تھا۔ اس حادثے کے فوراً بعد جائے وقوعہ پر آگ کا بڑا گولہ دیکھا گیا تھا اور سیاہ دھواں فضا میں بلند ہو گیا تھا جبکہ اس حادثے میں پائلٹ ہلاک ہو گیا تھا۔
