ماسکو (انٹرنیشنل ڈیسک)
ایران کی وزارت خارجہ نے بیان جاری کر کے ارجنٹائن کی بحریہ اور فضائیہ کو دہشت گرد تنظیمیں قرار دینے کا اعلان کیا ہے۔ بیان کا مکمل متن یہ ہے: چونکہ ارجنٹائن کی حکومت نے بین الاقوامی قانون کے بنیادی اصولوں کی خلاف ورزی کرتے ہوئے ایک معاندانہ اقدام کے طور پر اسلامی جمہوریہ ایران کی مسلح افواج کی ایک سرکاری شاخ، پاسداران انقلاب، کو دہشت گرد تنظیم قرار دیا ہے، اس لیے حکومت اسلامی جمہوریہ ایران، باہمی جوابی کارروائی کے اصول اور 2019 کے اس قانون کے تحت جس کا عنوان امریکا کی جانب سے پاسداران انقلاب کو دہشت گرد تنظیم قرار دینے کے خلاف جوابی اقدام ہے، اور جو صراحت کے ساتھ کہتا ہے کہ ہر وہ ملک جو کسی بھی طرح پاسداران انقلاب کو دہشت گرد تنظیم قرار دینے کے امریکی فیصلے کی پیروی یا حمایت کرے گا وہ جوابی کارروائی کا نشانہ ہوگا، ارجنٹائن کی بحریہ اور فضائیہ کو مذکورہ قانون اور اس کی دفعات کے تابع سمجھتی ہے اور انہیں دہشت گرد تنظیمیں قرار دیتی ہے۔ بیان میں کہا گیا کہ ظاہر ہے ارجنٹائن کی حکومت اس اقدام سے پیدا ہونے والے تمام نتائج کی مکمل ذمہ دار ہوگی۔
ارجنٹائن کے صدر خاویئر میلی کی حکومت نے جنوری میں پاسداران انقلاب کی قدس فورس کو دہشت گرد گروہ قرار دیا تھا، اور مارچ کے آخر میں اس فیصلے کا دائرہ پورے پاسداران انقلاب تک بڑھا دیا۔ بیونس آئرس نے اس فیصلے کا جواز 1994 میں ایمیا یہودی کمیونٹی مرکز پر ہونے والے بم دھماکے کو بنایا، جس میں 85 افراد ہلاک ہوئے تھے، اور ارجنٹائن اس کا الزام ایران کی حمایت یافتہ تنظیم حزب اللہ پر لگاتا ہے۔ ایران یہ الزامات مسترد کرتا ہے۔ ارجنٹائن نے فیصلے کے دو روز بعد ایران کے قائم مقام سفیر کو ملک بدر کر دیا تھا۔
ارجنٹائن کی وزارت خارجہ نے ایرانی اقدام کو سختی سے مسترد کرتے ہوئے کہا ہے کہ الزام بالکل بے بنیاد اور ناقابل قبول ہے۔ ایرانی بیان میں ارجنٹائن کی فوج کا ذکر نہیں کیا گیا۔
ایران نے اسی نوعیت کا اقدام اس ماہ کے آغاز میں بھی کیا تھا، جب یکم نومبر کو اس نے برطانیہ کی رائل نیوی اور رائل ایئر فورس کو دہشت گرد تنظیمیں اور برطانوی خفیہ ایجنسی ایم آئی 6 کو معاندانہ گروہ قرار دیا، اور یہ اس وقت ہوا جب لندن نے جولائی میں پاسداران انقلاب کو کالعدم قرار دیا تھا۔ اس سے قبل 2024 میں ایران نے رائل کینیڈین نیوی کے خلاف بھی ایسا ہی اعلان کیا تھا۔
