ایران میں ایف فور لڑاکا طیارہ تربیتی پرواز کے دوران گر کر تباہ، ایک پائلٹ جاں بحق
ماسکو(انٹرنیشنل ڈیسک)
ایران کی فضائیہ نے اعلان کیا ہے کہ ایک ایف فور (F-4) لڑاکا طیارہ رات کے وقت تربیتی پرواز کے دوران حادثے کا شکار ہو گیا۔ سرکاری بیان کے مطابق حادثے میں طیارے میں سوار دو پائلٹوں میں سے ایک جاں بحق ہو گیا جبکہ دوسرے پائلٹ کو زندہ بچا لیا گیا۔ حکام نے بتایا کہ طیارہ صوبہ ہمدان میں گر کر تباہ ہوا۔ ایرانی خبر رساں ادارے میزان نیوز ایجنسی نے جاں بحق پائلٹ کی تصویر جاری کرتے ہوئے ان کی شناخت بریگیڈیئر جنرل مہدی فیروزمند کے نام سے کی ہے۔ فضائیہ کے مطابق واقعے کی وجوہات جاننے کے لیے تحقیقات کا آغاز کر دیا گیا ہے۔ واضح رہے کہ ایف فور لڑاکا طیارہ عموماً دو پائلٹوں کے ساتھ پرواز کرنے کی صلاحیت رکھتا ہے۔
