ایرانی وزیر خارجہ عراقچی کا دورۂ ماسکو، صدر پوتن سے اہم ملاقات ہوگی
ماسکو (انٹرنیشنل ڈیسک)
اتوار کی صبح استنبول میں ایک پریس کانفرنس سے خطاب کرتے ہوئے ایران کے اعلیٰ سفارت کار عباس عراقچی نے اعلان کیا کہ وہ پیر کے روز روس کے دارالحکومت ماسکو کا دورہ کریں گے۔ انہوں نے بتایا کہ اس دورے کا مقصد روسی حکام کے ساتھ سنجیدہ مشاورت اور موجودہ خطے کی صورتحال پر تبادلہ خیال کرنا ہے۔ عراقچی کے مطابق ان کے شیڈول میں روسی صدر ولادیمیر پوتن سے ملاقات بھی شامل ہے۔
یہ دورہ ایک ایسے وقت میں ہو رہا ہے جب ایران کو اسرائیل اور امریکہ کی جانب سے اپنی سرزمین پر فوجی جارحیت کا سامنا ہے، اور خطے میں کشیدگی عروج پر ہے۔ عراقچی کا کہنا تھا کہ موجودہ صورتحال غیر معمولی ہے اور اس میں دوست ممالک کے ساتھ قریبی رابطے اور تعاون کی ضرورت ہے۔
تجزیہ کاروں کے مطابق ایران اور روس کے درمیان اس ملاقات میں جوہری پروگرام، حالیہ حملے، دفاعی تعاون اور خطے میں امریکہ و اسرائیل کے کردار پر تفصیل سے گفتگو متوقع ہے۔ ماہرین اسے ایران کی طرف سے روس کے ساتھ سفارتی یکجہتی بڑھانے اور عالمی حمایت کے حصول کی ایک اہم کوشش قرار دے رہے ہیں۔
