ایرانی سڑکوں پر مظاہرین اور موساد ایجنٹس کو نیا سال مبارک، مائیک پومپیو
ماسکو (انٹرنیشنل ڈیسک)
امریکہ کے سابق سیکریٹری آف اسٹیٹ اور سی آئی اے کے سابق ڈائریکٹر مائیک پومپیو نے کہا ہے کہ ایران کی حکومت شدید مشکل میں ہے اور فوجی مداخلت ان کی آخری امید ہے۔ غیر ملکی خبر رساں ادارے کے مطابق پومپیو نے کہا کہ ایران کے مختلف شہروں میں احتجاج ہو رہے ہیں۔ “ایرانی حکومت کے 47 برس اور ٹرمپ امریکہ کے 47ویں صدر، کیا یہ اتفاق نہیں؟” ان کا کہنا تھا کہ ایران کی سڑکوں پر احتجاج کرنے والے ایرانی عوام اور ان کے ساتھ چلنے والے موساد ایجنٹس کو نیا سال مبارک ہو۔
اس سے پہلے امریکی صدر ڈونلڈ ٹرمپ نے ایرانی مظاہرین کی مدد کے لیے مداخلت کا اعلان کرتے ہوئے کہا تھا کہ اگر ایران نے مظاہرین پر گولی چلائی اور انہیں ہلاک کیا تو امریکہ مظاہرین کو بچانے کے لیے آگے آئے گا۔ ٹرمپ کا کہنا تھا کہ امریکہ نے نشانہ باندھ لیا ہے اور کسی بھی اقدام کے لیے تیار ہے۔
یہ بیانات ایران میں معاشی بحران اور ریال کی شدید گراوٹ کی وجہ سے شروع ہونے والے احتجاج کے تناظر میں سامنے آئے ہیں جو اب سیاسی رنگ اختیار کر چکے ہیں۔
