معروف روسی فوجی پائلٹ الیگزینڈر ویروزب 79 برس کی عمر میں انتقال کر گئے
ماسکو (صداۓ روس)
روسی فضائیہ کے ممتاز اور تجربہ کار فوجی ایروبَیٹک پائلٹ الیگزینڈر واسیلیویچ ویروزب 79 برس کی عمر میں انتقال کر گئے۔ ان کے انتقال کی تصدیق روس کے مشہور ایروبَیٹک فلائنگ گروپ روسی نائٹس (Russian Knights) کی پریس سروس نے 13 جنوری کو کی۔ روسی نائٹس کے سرکاری ٹیلیگرام چینل پر جاری بیان میں کہا گیا ہے کہ
“ہم انتہائی رنج و غم کے ساتھ اطلاع دیتے ہیں کہ ممتاز فوجی ایروبَیٹک پائلٹ، ریٹائرڈ لیفٹیننٹ کرنل الیگزینڈر واسیلیویچ ویروزب 79 برس کی عمر میں وفات پا گئے ہیں۔” تاحال ان کے انتقال کی وجہ اور تدفین کی تاریخ کے بارے میں کوئی تفصیلات جاری نہیں کی گئیں۔
الیگزینڈر ویروزب 24 مئی 1947 کو ماسکو ریجن میں پیدا ہوئے۔ انہوں نے 1971 میں خارکیف ہائر ملٹری ایوی ایشن اسکول آف پائلٹس سے گریجویشن مکمل کی۔ بعد ازاں 1976 میں انہیں طیارہ جاتی مظاہراتی یونٹ میں بطور ایروبَیٹک پائلٹ شامل کیا گیا، جہاں انہوں نے اپنی غیر معمولی مہارت اور پیشہ ورانہ صلاحیتوں سے نمایاں مقام حاصل کیا۔ اپنی طویل اور شاندار فوجی خدمات کے دوران الیگزینڈر ویروزب کو اعلیٰ کارکردگی اور پیشہ ورانہ مہارت کے اعتراف میں آرڈر آف دی ریڈ اسٹار سمیت متعدد اعزازات اور تمغوں سے نوازا گیا۔ ان کا شمار روسی فوجی ہوا بازی کی اُن شخصیات میں ہوتا ہے جنہوں نے ایروبَیٹک فلائنگ کے شعبے میں گراں قدر خدمات انجام دیں اور نئی نسل کے پائلٹس کے لیے ایک مثال قائم کی۔ 
