بچپن کی غذائی عادات دل کے امراض کی بنیاد بن سکتی ہیں، ماہرِ امراضِ قلب
اسلام آباد (صداۓ روس)
لاہور کے معروف کنسلٹنٹ کارڈیالوجسٹ Syed Javed Sabzwari کا کہنا ہے کہ دل کی بیماریوں کی بنیاد اکثر بچپن ہی میں پڑ جاتی ہے، اس لیے ضروری ہے کہ بچوں کی غذائی عادات کو ابتدا سے ہی درست کیا جائے تاکہ وہ مستقبل میں صحت مند دل کے ساتھ زندگی گزار سکیں۔ انہوں نے کہا کہ ہمارے معاشرے میں بچوں کو بڑے نوالے کھانے اور جلدی جلدی کھانا ختم کرنے کی ترغیب دی جاتی ہے، حتیٰ کہ اسکولوں، کالجوں، ٹی وی اور سوشل میڈیا پر بھی کھانے کے مقابلے منعقد کیے جاتے ہیں جہاں تیزی سے زیادہ مقدار میں کھانے والے کو کامیاب قرار دیا جاتا ہے، حالانکہ طبی اعتبار سے یہ طرزِ عمل نقصان دہ ہے۔ ڈاکٹر جاوید سبزواری کے مطابق بچوں کو شروع سے ہی کھانا آہستہ آہستہ، اچھی طرح چبا کر اور ذائقہ محسوس کرتے ہوئے کھانے کی عادت ڈالنی چاہیے۔ اگر مقابلوں کا انداز تبدیل کر کے ایسے مقابلے کروائے جائیں جن میں آہستہ اور اچھی طرح چبا کر کھانے والے بچے کو انعام دیا جائے تو نہ صرف معدہ، چھوٹی آنت، پتہ اور جگر کے مسائل میں کمی آسکتی ہے بلکہ ہائی بلڈ پریشر، ذیابیطس اور دل کے امراض پر بھی قابو پایا جا سکتا ہے۔
انہوں نے مزید کہا کہ صحت کے بے شمار مسائل کا تعلق ہمارے کھانے کے انداز اور روزمرہ عادات سے ہے۔ والدین کی ذمہ داری ہے کہ بچوں کو کم مقدار میں، سکون کے ساتھ کھانا کھانے اور پانی، دودھ یا تازہ پھلوں کے جوس کو چھوٹے گھونٹوں میں پینے کی عادت ڈالیں۔ ان کا کہنا تھا کہ اگر تعلیمی اداروں اور میڈیا میں صحت مند غذائی عادات کو فروغ دیا جائے تو وقت کے ساتھ معاشرے میں مثبت تبدیلی آسکتی ہے۔ انہوں نے زور دیا کہ انسان زندگی کے کسی بھی مرحلے میں اپنی عادات بدل کر صحت مند جسم اور مضبوط دل حاصل کر سکتا ہے۔
