امور ریجن میں مال بردار ٹرین کے 30 سے زائد ڈبے پٹڑی سے اتر گئے
ماسکو (صداۓ روس)
ٹرانس بائیکال ریلوے کے ایک حصے پر آمد و رفت عارضی طور پر معطل
روس کے امور ریجن میں ایک مال بردار ٹرین کے ڈبے پٹڑی سے اتر گئے۔ روسی وزارتِ ہنگامی حالات کے علاقائی شعبے کی پریس سروس نے 5 جنوری کو اس واقعے کی اطلاع دی۔ محکمے کے ٹیلیگرام چینل پر جاری بیان کے مطابق ٹرانس بائیکال ریلوے کے گونژا–گوداچی سیکشن پر ایک مال بردار ٹرین پٹڑی سے اتر گئی، جس کے نتیجے میں مجموعی طور پر 35 ڈبے متاثر ہوئے۔ بیان میں کہا گیا ہے کہ اس واقعے میں کوئی جانی نقصان نہیں ہوا اور نہ ہی ماحولیاتی سلامتی کو کوئی خطرہ لاحق ہوا۔ تاہم ریلوے کے بنیادی ڈھانچے کو نقصان پہنچا ہے، جس کے باعث اس ریلوے سیکشن پر ٹرین سروس عارضی طور پر معطل کر دی گئی ہے۔
واضح رہے کہ 28 دسمبر کو نارتھ قفقاز ریلوے نے بھی اطلاع دی تھی کہ روستوف آن دون میں ایک مال بردار ٹرین کے انجن کے پٹڑی سے اترنے کے باعث تقریباً 20 طویل فاصلے کی ٹرینیں تاخیر کا شکار ہوئیں، تاہم اس واقعے میں بھی کوئی جانی نقصان نہیں ہوا تھا۔ 
