پاکستان اور سعودی عرب کے دفاعی معاہدے پر کوئی اعتراض نہیں، روسی سفیر
اسلام آباد (صداۓ روس)
پاکستان اور سعودی عرب کے مابین دفاعی معاہدے کے حوالے سے بعض پاکستانی ذرائع ابلاغ میں شائع ہونے والی رپورٹس پر وضاحت دیتے ہوئے پاکستان میں روس کے سفیر البرٹ پی خوریف نے کہا ہے کہ ماسکو اس معاملے کو دونوں آزاد ریاستوں کا خود مختار حق سمجھتا ہے۔ ایک صحافی کے سوال کے جواب میں روسی سفیر نے کہا کہ ’’روسی فریق دو آزاد ریاستوں کے خود مختار حق کا احترام کرتا ہے کہ وہ باہمی مفادات کے شعبہ جات میں بین الاقوامی معاہدوں پر دستخط کریں اور تعاون کو فروغ دیں۔‘‘ ان کا مزید کہنا تھا کہ روس دیگر ممالک کے تعلقات اور تعاون کو اپنی نظر سے نہیں دیکھتا بلکہ اصولی طور پر یہ مؤقف رکھتا ہے کہ ہر ریاست کو اپنے قومی مفاد کے مطابق فیصلے کرنے کا حق حاصل ہے۔ اس تناظر میں روس پاکستان اور سعودی عرب کے باہمی تعاون کو ایک مثبت عمل کے طور پر دیکھتا ہے، جو خطے میں تعلقات کے استحکام اور تعاون کو فروغ دے سکتا ہے۔
روسی سفیر کی اس وضاحت سے یہ بات سامنے آئی ہے کہ ماسکو پاکستان اور سعودی عرب کے درمیان طے پانے والے معاہدے پر نہ صرف کوئی اعتراض نہیں رکھتا بلکہ اسے دونوں ممالک کی خود مختاری کا حصہ تصور کرتا ہے۔
