پاکستان نے جنوبی افریقہ کو 9 وکٹوں سے شکست دے دی
اسلام آباد (صداۓ روس)
پاکستان نے دوسرے ٹی 20 میچ میں جنوبی افریقہ کو 9 وکٹوں سے شکست دے دی۔ پاکستان کی جانب سے صائم ایوب نے 38 گیندوں پر 5 چھکوں اور 6 چوکوں کی مدد سے 71 رنز کی ناقابل شکست اننگ کھیلی، بابر اعظم 11 رنز بنا کر ناٹ آؤٹ رہے جبکہ صاحبزادہ فرحان 23 گیندوں پر 28 رنز بنا کر پویلین لوٹے. جنوبی افریقہ کی جانب سے واحد وکٹ کوربن بوش نے حاصل کی۔ قبل ازیں راولپنڈی کرکٹ سٹیڈیم میں کھیلے گئے میچ میں جنوبی افریقہ نے پاکستانی کپتان سلمان آغا کی دعوت پر پہلے کھیلتے ہوئے 110 رنز بنائے، مہمان ٹیم مقررہ 20 اوورز بھی پورے نہ کھیل سکی اور محض 19.2 اوورز میں پویلین لوٹ گئی۔ جنوبی افریقہ کی پہلی وکٹ بغیر کھاتہ کھلے ہی گر گئی جب اوپنر بیٹر ریزا ہینڈرکس سلمان مرزا کا شکار بنے، 12 رنز کے مجموعے پر جنوبی افریقہ کا دوسرا نقصان ہوا جب کوانٹن ڈی کوک 7 رنز بنا کر نسیم شاہ کی گیند پر سلمان آغا کے ہاتھوں کیچ تھما بیٹھے۔
مہمان ٹیم کے ٹونی ڈی زورزی بھی 15 رنز کے مجموعے پر 7 رنز بنا کر چلتے بنے ، جنوبی افریقہ کے ڈیوالڈ بریوس نے 25 رنز کی اننگ کھیلی، میتھیوبریزک 5 جبکہ کپتان ڈنوون فریریا کریز پر 15 رنز کے مہمان ثابت ہوئے۔ جنوبی افریقہ کے جارج لنڈے اور ناندرے برگر 9،9 جبکہ کوربن بوش 11 رنز بنا کر پویلین لوٹے جبکہ بارٹ مین 12 رنز ہی بنا سکے۔ پاکستان کی جانب سے فہیم اشرف نے 4،سلمان مرز نے 3 کھلاڑیوں کو پویلین کی راہ دکھائی جبکہ نسیم شاہ نے 2 اور ابرار احمد نے ایک وکٹ حاصل کی۔ 
