پاکستان کا ٹی ٹوئنٹی ورلڈ کپ کے بائیکاٹ پر غور
ماسکو (صداۓ روس)
آئی سی سی ٹی ٹوئنٹی ورلڈ کپ میں بنگلادیش کے بھارت سے میچ منتقل کرنے کے مطالبے کو تسلیم نہ کرنے کے بعد پاکستان بھی ورلڈ کپ کے بائیکاٹ پر غور کر رہا ہے۔ ذرائع کے مطابق اگر بنگلادیش ورلڈ کپ میں شرکت سے انکار کرتا ہے تو پاکستان کے بھی بائیکاٹ کا امکان بڑھ جائے گا۔ بنگلادیش کی ٹیم آج یہ فیصلہ کرے گی کہ وہ ورلڈ کپ میں شرکت کرے گی یا نہیں۔ بنگلادیش کے کئی سینئر کھلاڑی ورلڈ کپ میں شرکت کے حق میں ہیں، جبکہ بنگلادیش حکومت آج کھلاڑیوں سے مشاورت کرے گی اور انہیں اعتماد میں لے گی۔ واضح رہے کہ گزشتہ روز آئی سی سی نے بنگلادیش کی درخواست باضابطہ طور پر مسترد کرتے ہوئے کہا تھا کہ بنگلادیش کو اگر ورلڈ کپ کھیلنا ہے تو میچز میزبان ملک بھارت میں ہی کھیلنے ہوں گے۔ کرکٹ ویب سائٹس کے مطابق، اگر بنگلادیش بھارت نہ جانے کا فیصلہ کرتا ہے تو آئی سی سی کسی اور ٹیم کو شامل کرنے پر بھی غور کر رہا ہے۔
