ماسکو (انٹرنیشنل ڈیسک)
پاکستان نے تین ملکی ون ڈے سیریز کے چوتھے میچ میں انگلینڈ کو ایک وکٹ سے شکست دے دی۔ شاداب خان نے حارث رؤف کے ساتھ آخری وکٹ پر 89 رنز کی شراکت قائم کر کے ناممکن کو ممکن کر دکھایا اور قومی ٹیم کو فتح دلا دی۔ قذافی اسٹیڈیم لاہور میں کھیلے گئے میچ میں پاکستان نے 242 رنز کا ہدف 48ویں اوور میں حاصل کر لیا۔ شاداب خان نے 113 رنز کی ناقابل شکست اننگز کھیلی اور شاندار بیٹنگ کرتے ہوئے اپنے کیریئر کی پہلی سنچری اسکور کی۔ انگلینڈ کے دیے گئے 242 رنز کے ہدف کے تعاقب میں پاکستان کا آغاز اچھا نہیں رہا۔ ٹیم کے 102 رنز پر بابر اعظم سمیت آدھے کھلاڑی پویلین لوٹ چکے تھے، جبکہ 154 رنز پر 9 وکٹیں گر گئیں اور میچ کسی بھی وقت ختم ہو سکتا تھا۔ ایسے میں شاداب خان اور حارث رؤف آخری وکٹ کے طور پر اکٹھے ہوئے۔
حارث نے وکٹ پر ڈٹ کر کھیلا جبکہ شاداب نے آہستہ آہستہ اسکور آگے بڑھانا شروع کیا۔ شاداب نے پہلے 52 گیندوں پر نصف سنچری مکمل کی، جس میں سات چوکے اور ایک چھکا شامل تھا، اور پھر دونوں کے درمیان شراکت مضبوط ہوتی گئی۔ 97 کے اسکور پر ری ویو میں ناٹ آؤٹ قرار دیے جانے کے بعد شاداب خان نے اپنی سنچری مکمل کی۔ انہوں نے 92 گیندوں پر 12 چوکوں اور چار چھکوں کی مدد سے ون ڈے کیریئر کی پہلی سنچری بنائی۔ نئی زندگی ملنے کے بعد دونوں کھلاڑیوں نے بقیہ 21 رنز حاصل کر کے پاکستان کو ٹرائی نیشن سیریز کے فائنل میں پہنچا دیا۔ شاداب خان 113 رنز بنا کر ناقابل شکست رہے اور پلیئر آف دی میچ قرار پائے۔ حارث رؤف نے سات رنز اسکور کیے۔ پاکستان کی جانب سے سعد بیگ نے 32، سلمان آغا نے 26 اور حسن نواز نے 15 رنز بنائے، جبکہ بابر اعظم اور فخر زمان 10، 10 رنز ہی بنا سکے۔
