پاکستان نے آسٹریلیا کو 7 سال بعد ٹی ٹوئنٹی سیریز میں شکست دے دی
اسلام آباد (صداۓ روس)
پاکستان نے سات سال کے وقفے کے بعد آسٹریلیا کے خلاف ٹی ٹوئنٹی سیریز اپنے نام کر لی۔ لاہور کے قذافی اسٹیڈیم میں کھیلے گئے میچ میں قومی ٹیم نے شاندار کارکردگی کا مظاہرہ کرتے ہوئے مہمان ٹیم کو یکطرفہ مقابلے میں شکست دی اور سیریز میں ناقابلِ شکست برتری حاصل کر لی۔ میچ میں پاکستان نے ٹاس جیت کر پہلے بیٹنگ کرنے کا فیصلہ کیا۔ قومی ٹیم نے مقررہ 20 اوورز میں 5 وکٹوں کے نقصان پر 198 رنز اسکور کیے۔ کپتان سلمان علی آغا نے ذمہ دارانہ اور جارحانہ بیٹنگ کرتے ہوئے 76 رنز بنائے، عثمان خان نے 53 رنز کی اہم اننگز کھیلی جبکہ صائم ایوب نے 23 رنز اسکور کیے۔ شاداب خان 28 رنز بنا کر ناٹ آؤٹ رہے۔ آسٹریلیا کی جانب سے زیویئر بارٹلیٹ، میتھیو کنہیمین، شین ایبٹ، ایڈم زیمپا اور کوپر کونولی نے ایک ایک وکٹ حاصل کی۔ 199 رنز کے ہدف کے تعاقب میں آسٹریلوی ٹیم پاکستانی باؤلنگ کے سامنے بے بس نظر آئی اور 16ویں اوور میں 108 رنز پر آؤٹ ہو گئی۔ مہمان ٹیم کی جانب سے کیمرون گرین 35 اور میتھیو شارٹ 27 رنز کے ساتھ نمایاں رہے، جبکہ سات بیٹرز دہرے ہندسے میں داخل ہونے میں بھی ناکام رہے۔
آسٹریلیا کی تمام وکٹیں پاکستانی اسپنرز نے حاصل کیں۔ شاداب خان اور ابرار احمد نے تین، تین کھلاڑیوں کو آؤٹ کیا، عثمان طارق نے دو جبکہ صائم ایوب اور محمد نواز نے ایک ایک وکٹ حاصل کی۔ اس فتح کے ساتھ ہی پاکستان نے سیریز میں 0-2 کی ناقابلِ شکست برتری حاصل کر لی۔ ٹاس کے بعد گفتگو کرتے ہوئے پاکستانی ٹیم کے کپتان سلمان علی آغا نے بتایا کہ اس میچ کے لیے ٹیم میں تین تبدیلیاں کی گئی تھیں۔ عثمان طارق، فہیم اشرف اور نسیم شاہ کو پلیئنگ الیون میں شامل کیا گیا جبکہ شاہین شاہ آفریدی، سلمان مرزا اور فخر زمان اس میچ میں شامل نہیں تھے۔ یاد رہے کہ سیریز کے پہلے ٹی ٹوئنٹی میچ میں بھی پاکستان نے آسٹریلیا کو 22 رنز سے شکست دی تھی، جبکہ سیریز کا آخری میچ کل کھیلا جائے گا۔ 
