صدر زرداری کی کابل دھماکے کی شدید مذمت، چینی شہریوں سے یکجہتی کا اظہار
اسلام آباد (صداۓ روس)
صدرِ پاکستان آصف علی زرداری نے کابل میں ایک چینی ریسٹورنٹ پر ہونے والے بم دھماکے کی شدید الفاظ میں مذمت کی ہے، جس کے نتیجے میں قیمتی انسانی جانوں کا ضیاع ہوا جبکہ ایک چینی شہری کے زخمی اور ایک کے جاں بحق ہونے کی اطلاعات ہیں۔ صدر مملکت نے اس افسوسناک واقعے پر گہرے دکھ اور رنج کا اظہار کرتے ہوئے جاں بحق افراد کے اہلِ خانہ سے دلی تعزیت کی۔ صدر آصف علی زرداری نے دھماکے میں زخمی ہونے والے افراد اور ان کے اہلِ خانہ سے بھرپور ہمدردی کا اظہار کیا اور ان کی جلد صحت یابی کے لیے نیک تمناؤں کا اظہار کیا۔ انہوں نے افغانستان میں کام کرنے والے چینی شہریوں کے عزم، حوصلے اور حوصلہ مندی کو خراجِ تحسین پیش کیا جو بڑھتی ہوئی بدامنی اور اپنی جانوں کو لاحق سنگین خطرات کے باوجود افغانستان کی ترقی اور بحالی کے لیے اپنی خدمات جاری رکھے ہوئے ہیں۔
صدرِ پاکستان نے اس موقع پر اس امر پر زور دیا کہ پاکستان بارہا یہ مؤقف اختیار کرتا رہا ہے کہ افغانستان کی سرزمین کسی بھی دہشت گرد تنظیم کے لیے محفوظ پناہ گاہ نہیں بننی چاہیے، کیونکہ ایسی سرگرمیاں نہ صرف پاکستان بلکہ افغانستان کے دیگر ہمسایہ ممالک کے امن و استحکام کے لیے بھی سنگین خطرہ ہیں۔ انہوں نے کہا کہ افغان سرزمین سے دہشت گرد عناصر کی سرگرمیوں کے منفی اثرات پورے خطے پر مرتب ہو رہے ہیں۔ 
صدر زرداری نے دوحہ امن معاہدے پر اس کی اصل روح اور متن کے مطابق مکمل عملدرآمد کی ضرورت پر زور دیتے ہوئے کہا کہ سرحد پار دہشت گردی کے خاتمے کے لیے ٹھوس اور مؤثر اقدامات ناگزیر ہیں۔ انہوں نے واضح کیا کہ افغانستان میں پائیدار امن کے قیام کے لیے بین الاقوامی وعدوں کی پاسداری اور ذمہ دارانہ طرزِ عمل اختیار کرنا وقت کی اہم ضرورت ہے۔
