پاکستان کی ایپل اور سام سنگ کو مینوفیکچرنگ پلانٹس کے قیام کی دعوت
اسلام آباد (صداۓ روس)
اسلام آباد میں ٹیکنالوجی کے شعبے سے متعلق اہم پیش رفت سامنے آئی ہے، جہاں حکومتِ پاکستان نے عالمی ٹیکنالوجی کمپنیوں ایپل اور سام سنگ کو ملک میں مینوفیکچرنگ پلانٹس قائم کرنے کی باضابطہ دعوت دے دی ہے۔ حکام کے مطابق یہ اقدام مقامی صنعت کے فروغ اور الیکٹرانکس سیکٹر میں سرمایہ کاری بڑھانے کی حکمتِ عملی کا حصہ ہے۔ انجینئرنگ ڈویلپمنٹ بورڈ نے موبائل اور الیکٹرانک ڈیوائسز مینوفیکچرنگ پالیسی 2026–33 کو حتمی شکل دے دی ہے۔ پالیسی کا مقصد بڑے پیمانے پر روزگار کے مواقع پیدا کرنا، جدید ٹیکنالوجی اور انجینئرنگ مہارت کی منتقلی کو یقینی بنانا، اور درآمدی انحصار کم کر کے “میڈ اِن پاکستان” مصنوعات کو فروغ دینا ہے۔ وزیراعظم کے معاونِ خصوصی ہارون اختر خان نے تصدیق کی ہے کہ مذکورہ پالیسی حتمی منظوری کے لیے وزیراعظم شہباز شریف کو ارسال کی جا رہی ہے۔ حکام کا کہنا ہے کہ نئی پالیسی کے تحت غیر ملکی سرمایہ کاروں کو مراعات، مقامی سپلائی چین کی ترقی، اور برآمدات میں اضافے کے لیے سازگار ماحول فراہم کیا جائے گا۔
سرکاری ذرائع کے مطابق حکومت اس پالیسی کے ذریعے پاکستان کو عالمی الیکٹرانکس مینوفیکچرنگ کے نقشے پر نمایاں مقام دلانے کے لیے پرعزم ہے، جبکہ مقامی ہنر مند افرادی قوت کے لیے نئے مواقع بھی پیدا ہوں گے۔ 
