پاکستان مشکل وقت میں قطر کے ساتھ کھڑا ہے: وزیراعظم شہباز شریف
اسلام آباد (صداۓ روس)
وزیراعظم شہباز شریف نے کہا ہے کہ پاکستان مشکل وقت میں اپنے برادر ملک قطر کے ساتھ کھڑا ہے اور ہر سطح پر اس کی حمایت جاری رکھے گا۔ دوحہ میں عرب اسلامک سربراہی اجلاس کے موقع پر وزیراعظم شہباز شریف نے امیرِ قطر شیخ تمیم بن حمد الثانی سے ملاقات کی۔ ملاقات میں ڈپٹی وزیراعظم اسحاق ڈار اور فیلڈ مارشل سید عاصم منیر بھی موجود تھے۔ دونوں ممالک کے رہنماؤں نے خطے کی تازہ ترین صورتحال پر تفصیلی تبادلہ خیال کیا اور قریبی رابطے میں رہنے پر اتفاق کیا۔ وزیراعظم نے 9 ستمبر کو دوحہ پر اسرائیلی حملے کی شدید مذمت کرتے ہوئے کہا کہ یہ اقدام قطر کی خودمختاری اور عالمی قوانین کی کھلم کھلا خلاف ورزی ہے۔ انہوں نے کہا کہ پاکستان قطر کے ساتھ مکمل اظہارِ یکجہتی کرتا ہے اور اس مشکل گھڑی میں برادر ملک کے شانہ بشانہ کھڑا ہے۔ وزیراعظم شہباز شریف نے کہا کہ پاکستان اور قطر کے تعلقات مزید مضبوط ہوں گے۔ انہوں نے اس بات پر زور دیا کہ مشرق وسطیٰ میں اسرائیلی جارحیت کو فوری طور پر روکا جائے اور مسلم امہ کے اتحاد کی آج پہلے سے زیادہ ضرورت ہے۔
