ٹی20 ٹرائی نیشن سیریز پاکستان کے نام، فائنل میں سری لنکا کو شکست
اسلام آباد (صداۓ روس)
ٹی ٹوئنٹی ٹرائی نیشن سیریز کے فائنل میں پاکستان نے شاندار کارکردگی کا مظاہرہ کرتے ہوئے سری لنکا کو 6 وکٹوں سے ہرایا اور ٹائٹل اپنے نام کرلیا۔ راولپنڈی اسٹیڈیم میں کھیلے گئے فیصل کن معرکے میں سری لنکا نے پاکستان کو جیت کے لیے 115 رنز کا ہدف دیا، جسے گرین شرٹس نے ذمہ دارانہ بیٹنگ کرتے ہوئے 8 گیندیں قبل حاصل کرلیا۔
ہدف کے تعاقب میں پاکستان کی اوپننگ جوڑی نے پراعتماد آغاز فراہم کیا۔ صاحبزادہ فرحان اور صائم ایوب نے ابتدائی اووز میں 46 رنز کی شراکت قائم کی۔ اس مرحلے پر فرحان 23 رنز بنا کر آؤٹ ہوئے جبکہ صائم ایوب نے جارحانہ بیٹنگ کرتے ہوئے 6 چوکوں کی مدد سے 36 رنز اسکور کیے اور ہسارانگا کی گیند پر ایل بی ڈبلیو قرار پائے۔ کپتان سلمان آغا بھی زیادہ دیر کریز پر نہ رک سکے اور 14 رنز بنا کر رتنائیکے کا شکار بنے، جبکہ فخر زمان صرف 3 رنز بنا کر پویلین لوٹ گئے۔ آخر میں بابر اعظم نے پراعتماد بیٹنگ کرتے ہوئے 37 رنز کی ناقابلِ شکست اننگز کھیلی، جن کا ساتھ عثمان خان نے دیا اور پاکستان نے مقررہ ہدف آسانی سے حاصل کرلیا۔
اس سے قبل سری لنکا نے ٹاس ہار کر پہلے بیٹنگ شروع کی اور 84 رنز پر اس کی پہلی وکٹ گری۔ لیکن پاکستانی بولرز کی تباہ کن باولنگ کی بدولت سری لنکن ٹیم صرف 114 رنز پر ڈھیر ہوگئی۔ کامل مشرا نے 59 رنز بنا کر مزاحمت کی، تاہم دوسرے بیٹرز ناکام رہے۔ پاکستان کی جانب سے محمد نواز اور شاہین آفریدی نے تین تین وکٹیں حاصل کیں، جبکہ ابرار احمد نے دو اور سلمان مرزا و صائم ایوب نے ایک ایک وکٹ اپنے نام کی۔ 
فائنل میں پاکستان نے اپنی پلئینگ الیون میں ایک تبدیلی کی، جس کے تحت فاسٹ بولر شاہین آفریدی کی واپسی ہوئی جبکہ وسیم جونیئر کو ڈراپ کیا گیا۔ دوسری جانب سری لنکا نے اپنی ٹیم میں کوئی تبدیلی نہیں کی۔ ٹاس کے موقع پر کپتان سلمان علی آغا نے کہا کہ اگرچہ پچ عام پنڈی وکٹ کی طرح نہیں، لیکن 160 سے 170 کا مجموعہ قابلِ دفاع ہوسکتا ہے۔ سری لنکن کپتان داسن شاناکا نے بھی ٹھنڈے موسم کو غیر اہم قرار دیتے ہوئے کہا کہ ان کی ٹیم ان حالات کی عادی ہے اور 160 سے زائد مجموعہ بونس ہوگا۔ سری لنکا نے فائنل میں جگہ زمبابوے اور پاکستان کے خلاف جیت کے بعد بنائی تھی۔ دونوں کپتانوں نے فائنل سے قبل مقامی ہوٹل میں ٹرافی کے ساتھ تصاویر بھی بنوائیں۔ محمد نواز کو فائنل میں بہترین کارکردگی پر پلیئر آف دی میچ اور سیریز میں مجموعی طور پر 10 وکٹیں لینے پر پلیئر آف دی سیریز قرار دیا گیا۔
