ٹرائی نیشن سیریز میں پاکستان کی شاندار کامیابی، سری لنکا 7 وکٹ سے زیر
اسلام آباد (صداۓ روس)
راولپنڈی میں کھیلی جانے والی ٹی 20 ٹرائی نیشن سیریز کے تیسرے میچ میں پاکستان نے سری لنکا کو سات وکٹوں سے شکست دے دی۔ گرین شرٹس نے مجموعی طور پر جارحانہ اور پراعتماد بیٹنگ کا مظاہرہ کرتے ہوئے 129 رنز کا آسان ہدف صرف 15 اعشاریہ 3 اوورز میں تین وکٹوں کے نقصان پر حاصل کیا۔ پاکستان کی جانب سے اوپننگ بیٹر صاحبزادہ فرحان نے عمدہ بیٹنگ کرتے ہوئے ناقابلِ شکست 80 رنز اسکور کیے۔ انہوں نے محض 45 گیندوں کا سامنا کیا اور اپنی اننگز میں 6 چوکے اور 5 چھکے شامل کیے۔ دیگر بیٹرز میں صائم ایوب نے 20، بابر اعظم نے 16 جبکہ کپتان سلمان علی آغا کھاتہ کھولے بغیر آؤٹ ہوئے۔ آخر میں عثمان خان نے 5 رنز ناٹ آؤٹ بنا کر ٹیم کو کامیابی دلائی۔سری لنکا کی جانب سے چمیرا نے 2 اور شانکا نے 1 وکٹ حاصل کی۔ شاندار آل راؤنڈ کارکردگی دکھانے پر محمد نواز کو میچ کا بہترین کھلاڑی قرار دیا گیا۔
اس سے قبل سری لنکا نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 7 وکٹوں کے نقصان پر 128 رنز بنائے۔ سری لنکا کے جانَتھ لیاناگے 41 رنز کے ساتھ ناٹ آؤٹ رہے، جبکہ کوشل پریرا نے 25 اور کمل مشرا نے 22 رنز اسکور کیے۔ پاکستان کی جانب سے محمد نواز نے 3 جبکہ سلمان مرزا، فہیم اشرف اور ابرار احمد نے ایک، ایک وکٹ حاصل کی۔ ٹاس کے دوران سری لنکن کپتان نے کہا کہ وکٹ بیٹنگ کے لیے سازگار دکھائی دے رہی ہے۔ پاکستانی ٹیم میں فاسٹ بولر شاہین شاہ آفریدی پاؤں کی انجری کے باعث شامل نہیں تھے، اور ان کی جگہ محمد وسیم جونیئر کو الیون کا حصہ بنایا گیا۔ پاکستان کی فائنل الیون میں شامل کھلاڑیوں میں صاحبزادہ فرحان، صائم ایوب، بابر اعظم، فخر زمان، عثمان خان، محمد نواز، فہیم اشرف، ابرار احمد، محمد وسیم جونیئر، سلیمان مرزا شامل تھے۔ سری لنکن ٹیم کمنڈو مینڈس، ونندو ہاسارنگا، دشمنتھا چمیرا، ایشان ملنگا، وجیاکانتھ وییسکنتھ پر مشتمل تھی۔ 
