تاجکستان کے صدر دو روزہ دورے پرپاکستان پہنچ گئے

اسلام آباد (صداۓ روس)
تاجکستان کے صدر امام علی رحمان دو روزہ دورے پر پاکستان پہنچ گئے جبکہ دونوں ممالک کے درمیان ٹرانزٹ ٹریڈ سمیت مختلف شعبوں میں تعاون کے فروغ کیلئے معاہدوں اور مفاہمت کی یادداشتوں پر دستخط کئے گئے۔ وزیراعظم شہباز شریف نے تاجک صدر کے دورے کو تعاون کے نئے دور کا آغاز قرار دیتے ہوئے کہا کہ پاکستان وسطی ایشیائی ممالک کے ساتھ ریلوے، روڈ اور انرجی نیٹ ورک کے فروغ کا خواہاں ہے، کاسا 1000منصوبے کی جلد تکمیل چاہتے ہیں جبکہ تاجک صدرنے کہا کہ مختلف شعبوں میں دوطرفہ تعلقات کو مضبوط بنانے کے خواہشمند ہیں‘دہشت گردی سمیت دیگر چیلنجوں سے مل کر نمٹیں گےاور افغانستان میں امن و استحکام کے لئے کام کریں گے۔ بدھ کو یہاں شہباز شریف اور صدر امام علی رحمان کے درمیان ون آن ملاقات اور وفود کی سطح پر مذاکرات ہوئے اور دونوں ممالک کے درمیان مختلف شعبوں میں تعاون کے معاہدوں اور مفاہمت کی یادداشتوں پر دستخط کئے گئے۔ اس موقع پر مشترکہ پریس کانفرنس کرتے ہوئے شہباز شریف نے کہا کہ تاجکستان کے صدر کے دورے سے دونوں ممالک کے درمیان تعاون اور ترقی کے نئے دور کا آغاز ہو گا۔امام علی رحمان نے کہا کہ پاکستان اور تاجکستان کے درمیان معاہدوں اور مفاہمت کی یادداشتوں پر دستخطوں سے ان تعلقات کو نئی جہت ملے گی‘ہم نے تاجکستان کو گوادر اور کراچی کی بندرگاہوں تک رسائی سے متعلق بھی تبادلہ خیال کیا ہے۔قبل ازیں اسلام آباد انٹر نیشنل ایئر پورٹ پر وفاقی وزیرتجارت سید نوید قمر نے پاکستان پہنچنے پر تاجک صدرکا پرتپاک استقبال کیا۔