البانیہ میں حکومت مخالف احتجاج، وزیراعظم کی رہائش گاہ پر حملہ
ماسکو(انٹرنیشنل ڈیسک)
البانیہ کے دارالحکومت Tirana میں حکومت مخالف ریلی کے دوران مظاہرین نے وزیر اعظم کے دفتر اور رہائش گاہ کو نشانہ بنایا۔ مقامی میڈیا کے مطابق مشتعل افراد نے مولوتوف کاک ٹیل پھینکے اور آتش بازی کے ذریعے عمارت پر حملے کی کوشش کی۔ رپورٹس کے مطابق احتجاج کی قیادت مرکزی اپوزیشن جماعت Democratic Party of Albania کے کارکنان کر رہے تھے، جنہوں نے وزیر اعظم Edi Rama سے استعفے کا مطالبہ کیا۔ پولیس نے صورتحال پر قابو پانے کے لیے آنسو گیس اور واٹر کینن کا استعمال کیا، جبکہ جھڑپیں کئی گھنٹوں تک جاری رہیں۔ ریلی سے خطاب کرتے ہوئے اپوزیشن رہنما اور سابق وزیر اعظم Sali Berisha نے ایڈی راما کو سخت تنقید کا نشانہ بنایا اور حکومت پر بدعنوانی اور معاشی بدحالی کا الزام عائد کیا۔ خبر رساں ادارے اے ایف پی کے مطابق بریشا کا کہنا تھا کہ “ہم البانیہ کو کرپشن اور غربت سے نکالیں گے۔” دوسری جانب وزیر داخلہ Albana Kociu نے اپوزیشن قیادت پر “تشدد پر اکسانے” کا الزام لگایا اور کارکنان سے پرامن رہنے کی اپیل کی۔ انہوں نے خبردار کیا کہ ایسے اقدامات شہریوں، پولیس اہلکاروں اور صحافیوں کے لیے خطرہ بن سکتے ہیں۔
