لاڑکانہ (صدائے روس) پاکستان کی پہلی خاتون وزیرِاعظم، جمہوریت کی علمبردار اور شہید رہنما متحرمہ بےنظیر بھٹو کی برسی کے موقع پر سندھ کے تاریخی علاقے گڑھی خدا بخش میں ایک بڑا عوامی جلسہ منعقد کیا گیا، جس میں ملک بھر سے پاکستان پیپلز پارٹی کے کارکنان، رہنما، منتخب نمائندے اور مختلف طبقات سے تعلق رکھنے والے شہریوں نے شرکت کی۔
جلسے کا آغاز تلاوتِ قرآنِ پاک اور شہیدوں کے ایصالِ ثواب کے لیے دعا سے ہوا۔ اس موقع پر متحرمہ بےنظیر بھٹو اور دیگر شہداء کے درجات کی بلندی کے لیے خصوصی فاتحہ خوانی کی گئی۔ جلسہ گاہ میں پارٹی پرچموں، بینرز اور شہید محترمہ کی تصاویر آویزاں کی گئیں، جبکہ شرکاء نے “جمہوریت زندہ باد” اور “بےنظیر بھٹو زندہ ہے” کے نعرے لگائے۔
جلسے سے خطاب کرتے ہوئے پیپلز پارٹی کی مرکزی قیادت اور سینئر رہنماؤں نے کہا کہ متحرمہ بےنظیر بھٹو نے آمریت، انتہاپسندی اور جبر کے خلاف تاریخی جدوجہد کی اور عوام کے حقِ حکمرانی کے لیے اپنی جان کا نذرانہ پیش کیا۔ مقررین نے کہا کہ بےنظیر بھٹو کا مشن آج بھی پارٹی کی سیاست کی بنیاد ہے، جس کا محور آئین کی بالادستی، پارلیمانی جمہوریت، صوبائی خودمختاری، خواتین کے حقوق اور سماجی انصاف ہے۔رہنماؤں نے موجودہ ملکی حالات پر گفتگو کرتے ہوئے کہا کہ پاکستان کو درپیش سیاسی و معاشی چیلنجز کا حل صرف جمہوری استحکام اور عوام دوست پالیسیوں میں ہے۔ انہوں نے اس عزم کا اظہار کیا کہ پیپلز پارٹی شہید بےنظیر بھٹو کے نظریات کی روشنی میں عوامی مسائل کے حل اور قومی یکجہتی کے لیے جدوجہد جاری رکھے گی۔ 
جلسے میں شریک کارکنان نے اپنے جذبات کا اظہار کرتے ہوئے کہا کہ بےنظیر بھٹو نہ صرف ایک سیاسی رہنما تھیں بلکہ وہ مظلوم طبقات، خواتین اور نوجوانوں کی آواز تھیں۔ شرکاء کا کہنا تھا کہ شہید محترمہ کی قربانی نے پاکستان میں جمہوریت کو نئی زندگی بخشی۔
جب کہ وزیراعظم شہباز شریف نے سابق وزیراعظم محترمہ بینظیر بھٹو شہید کو خراج عقیدت پیش کرتے ہوئے کہا ہے کہ بینظیر بھٹو نے جمہوریت اور عوامی حقوق، وفاقِ پاکستان کے استحکام کے لیے بے مثال جدوجہد کی۔ بینظیر بھٹو کے یوم شہادت پر جاری کیے گئے اپنے پیغام میں انہوں نے کہا کہ سیاسی عمل میں رواداری کو فروغ دیا جو لائق تحسین ہے، ان کی سیاسی میراث میں جذبہ حب الوطنی نمایاں ہے۔ شہباز شریف کا کہنا تھا کہ ملک و قوم کے لیے محترمہ بینظیر بھٹو کی خدمات کو ہمیشہ یاد رکھا جائے گا، ان کی سیاسی میراث میں جذبہ حب الوطنی نمایاں ہے۔
شہباز شریف نے کہا کہ اللّٰہ تعالیٰ محترمہ بینظیر بھٹو شہید کو جوارِ رحمت میں اعلیٰ مقام عطا فرمائے، اللّٰہ تعالیٰ ان کے اہلِ خانہ اور چاہنے والوں کو صبرِ جمیل دے،آمین۔
جلسے کے اختتام پر اجتماعی دعا کی گئی، جس میں ملک کی سلامتی، جمہوری استحکام، معاشی بہتری اور عوام کی خوشحالی کے لیے دعا مانگی گئی۔ برسی کا یہ اجتماع اس عہد کی تجدید بن گیا کہ متحرمہ بےنظیر بھٹو کا مشن اور نظریہ ہمیشہ زندہ رہے گا۔
