اسلام آباد (صداۓ روس)
پنجاب حکومت نے جائیداد کی دستاویزات کے حصول اور رجسٹریشن کے عمل میں شفافیت بڑھانے کے لیے بائیومیٹرک تصدیق لازمی کرنے کا فیصلہ کیا ہے۔ اس حوالے سے نیا رجسٹریشن ایکٹ 2026 گورنر پنجاب کو ارسال کر دیا گیا ہے۔ تفصیلات کے مطابق پنجاب اسمبلی نے یہ بل حال ہی میں کثرتِ رائے سے منظور کیا تھا، جس کی حتمی منظوری اب گورنر پنجاب دیں گے۔ نئے قانون کے تحت پرانے Registration Act 1908 میں ترمیم کی جائے گی اور بائیومیٹرک تصدیق کو لازمی شق کے طور پر شامل کیا جائے گا۔
بل کے مطابق جائیدادوں کی رجسٹریشن کے ساتھ ساتھ متعلقہ دیگر دستاویزات اور اشیاء کی تصدیق بھی بائیومیٹرک سسٹم کے ذریعے کی جائے گی۔ اس مقصد کے لیے پنجاب لینڈ ریکارڈ اتھارٹی ایک جدید الیکٹرانک ریکارڈ سسٹم تشکیل دے گی تاکہ جعلسازی اور غیر قانونی انتقالِ ملکیت کے امکانات کو کم کیا جا سکے۔ حکام کے مطابق اس اقدام کا مقصد جائیداد کے نظام میں شفافیت، تیزی اور عوامی اعتماد کو بہتر بنانا ہے۔
