صدر پوتن اور زیلنسکی کی جلد ملاقات کا امکان، امریکی ذرائع
ماسکو (انٹرنیشنل ڈیسک)
روسی صدر ولادیمیر پوتن اور یوکرین کے صدر ولادیمیر زیلنسکی کے درمیان جلد براہِ راست ملاقات متوقع ہے۔ امریکی انتظامیہ کے ایک ذریعے کے حوالے سے امریکی ویب پورٹل ایکسیوس نے رپورٹ کیا ہے کہ دونوں رہنماؤں کی ملاقات کے لیے ماحول تیزی سے سازگار ہو رہا ہے۔ امریکی عہدیدار نے ایکسیوس کو بتایا کہ صدر پوتن اور زیلنسکی کے درمیان ملاقات اب زیادہ دور نہیں رہی۔ تاہم اس سے قبل روس، امریکا اور یوکرین کے درمیان مزید سہ فریقی مذاکرات کا انعقاد ضروری سمجھا جا رہا ہے۔ عہدیدار کے مطابق واشنگٹن کا خیال ہے کہ رہنماؤں کی سطح پر ملاقات سے پہلے ان تکنیکی اور سفارتی اجلاسوں کا ہونا ناگزیر ہے، لیکن اگر موجودہ رفتار برقرار رہی تو یہ مرحلہ بھی جلد طے ہو سکتا ہے۔ امریکی حکام کے مطابق ابوظبی میں روس، امریکا اور یوکرین کے نمائندوں کے درمیان ہونے والے حالیہ سہ فریقی مذاکرات توقعات کے مطابق مثبت رہے۔ ایک اور امریکی عہدیدار نے کہا کہ واشنگٹن کو موجودہ صورتحال پر اطمینان ہے اور مذاکراتی عمل درست سمت میں آگے بڑھ رہا ہے۔
واضح رہے کہ ابوظبی میں سہ فریقی مشاورت 23 اور 24 جنوری کو منعقد ہوئی تھی، جس میں یوکرین تنازع کے حل، سکیورٹی معاملات اور علاقائی امور پر تفصیلی تبادلۂ خیال کیا گیا۔ ان مذاکرات کو مستقبل میں اعلیٰ سطحی ملاقاتوں کی بنیاد قرار دیا جا رہا ہے۔ 
