روس اور برازیل کو تعاون کی مکمل صلاحیت کو بروئے کار لانا چاہیے، روسی وزیرِاعظم
ماسکو (صداۓ روس)
روس کے وزیرِاعظم مائیکل میشوستن نے زور دیا ہے کہ روس اور برازیل کے درمیان تعاون کی موجودہ گنجائش کو مکمل طور پر فعال کرنا ناگزیر ہے۔ انہوں نے نائب وزرائےاعظم کے ساتھ اجلاس میں کہا کہ برازیل لاطینی امریکا کی سب سے بڑی ریاست اور روس کا اسٹریٹجک شراکت دار ہے، اس لیے دونوں ممالک تجارت کے حجم میں اضافہ کریں اور مقامی مصنوعات، خدمات اور ٹیکنالوجیز کی برآمدات کے لیے نئے شعبوں کی نشاندہی کریں۔ وزیرِاعظم نے اس بات پر بھی زور دیا کہ یوریشیائی اقتصادی یونین اور جنوبی مشترکہ منڈی کے درمیان تعاون کو وسعت دی جانی چاہیے، جس میں برازیل کلیدی کردار ادا کرتا ہے۔ ان کے مطابق یہ پیش رفت دونوں خطوں کے درمیان تجارتی اور صنعتی روابط کو مضبوط بنانے میں مدد دے گی۔ مائیکل میشوستن نے گزشتہ ہفتے برازیل کے اپنے ورکنگ دورے کا حوالہ دیتے ہوئے بتایا کہ اعلیٰ سطحی کمیشن کے اجلاس میں تجارت اور معیشت سے متعلق تعاون پر خصوصی توجہ دی گئی، بالخصوص صنعت اور زراعت کے شعبوں میں۔ اس موقع پر اہم اور امید افزا شعبوں کے ساتھ ساتھ مشترکہ منصوبوں پر بھی تفصیلی تبادلۂ خیال ہوا۔
روسی وزیرِاعظم کے مطابق توانائی، پُرامن جوہری توانائی، ٹرانسپورٹ، لاجسٹکس، معلوماتی ٹیکنالوجی اور دواسازی جیسے شعبوں میں تعاون کو مزید مضبوط کیا جائے گا۔ انہوں نے کہا کہ تعلیمی، علمی اور کھیلوں کے تبادلوں کے ذریعے ثقافتی اور انسانی روابط کو بھی وسعت دی جاتی رہے گی۔ انہوں نے بتایا کہ روس اور برازیل بزنس فورم کے دوران مشترکہ کوششوں کے عزم کی توثیق کی گئی، جہاں روسی کاروباری طبقے نے برازیلی شراکت داروں کے ساتھ براہِ راست تعاون بڑھانے میں گہری دلچسپی کا اظہار کیا۔ 
