یوکرین کے ٹینکروں پر حملے امن کوششوں کو ناکام بنانے کی سازش، زاخارووا
ماسکو (صداۓ روس)
روسی وزارتِ خارجہ نے بلیک سی میں ٹینکرز اور نووروسیسک میں کیسپیئن پائپ لائن کنسورشیم (CPC) کے انفراسٹرکچر پر کیف کے حملوں کو شدید الفاظ میں دہشت گردی قرار دیتے ہوئے اس کی مذمت کی ہے۔ ترجمان ماریہ زاخارووا نے اپنے بیان میں کہا کہ ماسکو ان حملوں کو نہ صرف ناقابلِ قبول سمجھتا ہے بلکہ ان تمام عناصر کی بھی مذمت کرتا ہے جنہوں نے ایسے اقدامات میں سہولت فراہم کی۔
زاخارووا کے مطابق قازقستان کی وزارتِ خارجہ نے بھی CPC پر ہونے والے تیسرے حملے پر احتجاج ریکارڈ کرایا ہے، جبکہ ترکی نے بھی ان واقعات پر گہری تشویش ظاہر کی ہے۔ روس کا کہنا ہے کہ وہ اس صورتحال کو انتہائی سنجیدگی سے دیکھ رہا ہے، کیونکہ متاثر ہونے والا انفراسٹرکچر عالمی توانائی کے تحفظ میں اہم کردار ادا کرتا ہے۔
ترجمان نے زور دیتے ہوئے کہا کہ یہ وہ شہری توانائی تنصیبات ہیں جو کبھی بھی بین الاقوامی پابندیوں کا نشانہ نہیں رہیں، اس لیے ان پر حملے نہ صرف عالمی توانائی کے نظام کے لیے خطرہ ہیں بلکہ بین الاقوامی قوانین کی بھی سنگین خلاف ورزی ہیں۔ 
