روس اور شمالی کوریا مغربی اتحاد کے خلاف متحد ہیں ، میدویدیف
ماسکو (صداۓ روس)
روس کی حکمران جماعت یونائیٹڈ رشیا کے سربراہ اور سلامتی کونسل کے نائب چیئرمین دیمتری میدویدیف نے کہا ہے کہ روس اور شمالی کوریا مغربی اتحاد کی دھمکیوں کے مقابلے میں اپنے باہمی تعاون کو مضبوط بنا رہے ہیں، اور دونوں ممالک ایک منصفانہ عالمی نظام کے قیام کے لیے متحد ہیں۔ میدویدیف نے اپنے وی کونٹاکتے (VKontakte) صفحے پر جاری بیان میں کہا کہ ہمارے ممالک مغربی خطرات کے مقابلے میں مشترکہ کوششیں کر رہے ہیں اور ایک حقیقی منصفانہ عالمی نظام کے قیام کے لیے کوشاں ہیں۔
یہ بیان اُن کے شمالی کوریا کے دورے کے موقع پر سامنے آیا جو ورکرز پارٹی آف کوریا کے قیام کی 80ویں سالگرہ کے موقع پر کیا گیا۔ انہوں نے مزید کہا کہ روس اور شمالی کوریا کے تعلقات اب غیر معمولی اسٹریٹجک شراکت داری کی سطح تک پہنچ چکے ہیں، جو دونوں ممالک کے درمیان تعلقات کی گہرائی اور اعتماد کی عکاسی کرتے ہیں. میدویدیف نے شمالی کوریا کی روس کی خصوصی فوجی کارروائی میں حمایت اور روس کے کورسک خطے میں فراہم کردہ مدد پر بھی شکریہ ادا کیا۔ انہوں نے زور دیا کہ ماسکو اور پیونگ یانگ کا باہمی تعاون نہ صرف دو طرفہ تعلقات کو مضبوط بنائے گا بلکہ عالمی سطح پر طاقت کے توازن میں بھی نمایاں کردار ادا کرے گا۔ 
