ماسکو (صدائے روس)
روسی وزارتِ اقتصادی ترقی کے کثیرالجہتی اقتصادی تعاون اور خصوصی منصوبہ جات کے شعبے کے ڈائریکٹر نکیتا کوندراتیف نے کہا ہے کہ روس 2026 کے دوران ملائیشیا، انڈونیشیا اور کویت کے شہریوں کے لیے ویزا کی شرط ختم کرنے کا ارادہ رکھتا ہے۔ روسی خبر رساں ادارے TASS کو سینٹ پیٹرزبرگ انٹرنیشنل اکنامک فورم 2026 کے موقع پر دیے گئے انٹرویو میں نکیتا کوندراتیف نے بتایا کہ ملائیشیا اور انڈونیشیا رواں سال روس کی ترجیحات میں سرفہرست ہیں، جبکہ کویت کے ساتھ بھی ویزا فری معاہدے پر پیش رفت کی توقع ہے۔ انہوں نے کہا کہ روس ان تینوں ممالک کے ساتھ مذاکراتی عمل کو مکمل کرنا چاہتا ہے تاکہ شہریوں کی آمدورفت، سیاحت، کاروباری روابط اور اقتصادی تعاون کو مزید فروغ دیا جا سکے۔
روسی عہدیدار نے امید ظاہر کی کہ روسی وزارتِ خارجہ متعلقہ معاہدوں کو حتمی شکل دینے اور ان کی منظوری کے عمل کو تیز کرے گی۔ واضح رہے کہ سینٹ پیٹرزبرگ انٹرنیشنل اکنامک فورم 2026 3 سے 6 جون تک “عملی مکالمہ: ایک مستحکم مستقبل کی جانب راستہ” کے عنوان کے تحت منعقد ہوا۔ فورم کی انتظامی کمیٹی کے ایگزیکٹو سیکریٹری انتون کوبیاکوف کے مطابق اس تقریب میں 142 ممالک کے نمائندوں نے شرکت کی، جبکہ ایک ہزار سے زائد معاہدوں پر دستخط کیے گئے جن کی مجموعی مالیت 6.642 ٹریلین روبل سے تجاوز کر گئی۔
