ماسکو (صداۓ روس)
روس کے نائب وزیر خارجہ آندرے روڈینکو نے کہا ہے کہ اگر امریکہ اور ایران دونوں دلچسپی ظاہر کریں تو روس ان کے درمیان تنازع کے حل کے لیے ثالث کا کردار ادا کرنے کو تیار ہے۔ روسی اخبار ازویستیا کو دیے گئے انٹرویو میں انہوں نے کہا کہ اگر تمام فریق ایسی آمادگی ظاہر کریں تو روس ثالثی کے لیے حاضر ہے۔
روڈینکو کے مطابق ماسکو ایرانی جوہری پروگرام کے حل کے سلسلے میں پہلے ہی اپنی خدمات پیش کر چکا ہے، تاہم اب تک روسی تجاویز کو حمایت حاصل نہیں ہو سکی۔ روس ماضی میں بھی کئی بار امریکہ اور ایران کے درمیان ثالثی کی پیشکش کر چکا ہے۔ کریملن کے ترجمان دمتری پیسکوف کہہ چکے ہیں کہ ماسکو جوہری معاہدے سمیت مختلف امور پر ایران کے ساتھ مسلسل مشاورت میں ہے اور سیاسی و سفارتی ذرائع سے مسئلے کے حل کے لیے ہر ممکن کوشش کے لیے تیار ہے۔ روڈینکو نے بھی گزشتہ برس مئی میں تہران کے دورے کے دوران ایرانی حکام کے سامنے ثالثی کی یہ پیشکش دہرائی تھی۔
واضح رہے کہ ایران کا موقف ہے کہ اس کا جوہری پروگرام پرامن مقاصد کے لیے ہے اور وہ جوہری ہتھیار بنانے کی کوشش سے انکار کرتا ہے۔ امریکہ نے صدر ٹرمپ کے پہلے دورِ اقتدار میں 2015 کے جوہری معاہدے سے علیحدگی اختیار کر لی تھی، جس کے بعد سے دونوں ممالک کے درمیان کشیدگی چلی آ رہی ہے۔
