روس کا آرمینیا-آذربائیجان سربراہی اجلاس میں امریکی بیانات کا جائزہ لینے کا اعلان
ماسکو (انٹرنیشنل ڈیسک)
روسی وزارتِ خارجہ کی ترجمان ماریا زاخارووا نے کہا ہے کہ ماسکو آرمینیا اور آذربائیجان کے حالیہ سربراہی اجلاس میں علاقائی ٹرانسپورٹ روٹس کی بحالی سے متعلق امریکہ کے بیانات کا بغور جائزہ لے گا۔ ماریا زاخارووا کے مطابق، آرمینیا اور آذربائیجان کے درمیان مصالحت کے کسی بھی عمل کو خطے کے تناظر اور مفادات کے توازن کے مطابق ہونا چاہیے۔ انہوں نے زور دیا کہ روس، آرمینیا اور آذربائیجان کے درمیان طے پانے والے تین فریقی معاہدے بدستور موثر اور قابلِ عمل ہیں اور کسی بھی فریق نے ان سے دستبرداری اختیار نہیں کی۔
روسی وزارتِ خارجہ نے اجلاس کو سراہتے ہوئے امید ظاہر کی کہ یہ خطے میں امن کے ایجنڈے کو آگے بڑھانے میں معاون ثابت ہوگا۔ تجزیہ کاروں کے مطابق، علاقائی ٹرانسپورٹ راستوں کی بحالی قفقاز میں تجارتی روابط، معاشی ترقی اور سیاسی استحکام کے لیے اہم سنگِ میل ثابت ہو سکتی ہے، تاہم اس عمل میں بڑے فریقوں کے درمیان اعتماد سازی کلیدی حیثیت رکھتی ہے۔
